حمزہ شہباز کا سیاسی سفر

پنجاب کی سیاست کے اہم ستون شریف خاندان کے چشم و چراغ، حمزہ شہباز 6 ستمبر انیس سو 74 کو پیدا ہوئے۔ انہوں نے گورنمنٹ کالج لاہور سے گریجوایشن اور لندن اسکول آف اکنامکس سے ایل ایل بی کی ڈگری حاصل کی.

1999 میں جب شریف خاندان کو جلا وطن کیا گیا تو، نوجوان حمزہ شہباز کی سیاست میں انٹری ہوئی۔ حمزہ شہباز نے پاکستان میں بطور جنرل سیکرٹری پاکستان مسلم لیگ ن پنجاب ذمہ داریاں نبھائیں۔

2008 میں، پہلی بار انتخابی سیاست کا حصہ بنے، انہوں نے لاہور سے دو نشستوں پر الیکشن لڑا، جن میں سے ایک صوبائی نشست پی پی 142  اور دوسری قومی اسمبلی کی نشست این اے 119 تھی، وہ صوبائی سیٹ پر ناکام ٹھہرے تاہم ایم این اے بننے میں کامیاب ہو گئے۔

2013  کے عام انتخابات میں، حمزہ شہباز ایک بار پھر اسی حلقہ سے منتخب ہو کر قومی اسمبلی کے ممبر بنے، جبکہ 2018 میں وہ ایک بار پھر دو حلقوں این اے ایک سو چوبیس اور پی پی ایک سو چھیالیس سے میدان میں اترے، اور دونوں پر کامیابی سمیٹی،

لیکن پارٹی مشاورت پر قومی اسمبلی کی نشست چھوڑ کر وہ ن لیگ کی جانب سے وزیراعلی پنجاب کے امیدوار ٹھہرے، مگر سردار عثمان بزدار کے ایک سو چھیاسی ووٹوں کے مقابلے میں ایک سو انسٹھ ووٹ حاصل کر سکے۔

قائد ایوان کے چناو میں ناکامی پر، حمزہ شہباز کو اپوزیشن لیڈر نامزد کیا گیا، یوں چھ ستمبر دو ہزار اٹھارہ کو وہ قائد حزب اختلاف پنجاب اسمبلی منتخب ہو گئے۔