ریڈ زون میں کسی کوبھی احتجاج کی اجازت نہیں:رانا ثناءاللہ

اسلام آباد میں پریس کانفرنس کرتے ہوئے رانا ثناء اللہ نے کہا کہ خبردار کرتا ہوں کہ کل کوئی ریڈ زون میں داخل نہ ہو، الیکشن کمیشن کا آفس ریڈ زون میں ہے، ریڈ زون میں کسی کوبھی احتجاج کی اجازت نہیں۔

انہوں نے کہا کہ ریڈ زون کے بجائے ایچ نائن پارک میں احتجاج کرسکتے ہیں،اگرکسی نے ریڈ زون میں داخلے کی کوشش کی تو پھر قانون کے مطابق روکا جائے گا،اطلاعات ہیں یہ الیکشن کمیشن پرحملہ آور ہو سکتے ہیں، پی ٹی آئی احتجاج کے نام پر انتشار پھیلانا چاہتی ہے۔

رانا ثناء اللہ نے کہا کہ الیکشن کمیشن فیصلے میں مجرمانہ سرگرمیوں منی لانڈرنگ، جعل سازی اور فیک اکاؤنٹس کی نشاندہی کی گئی، فیصلے کی بنیاد پرہم جائزہ لے رہے ہیں۔ ہرچیزآئین وقانون کے مطابق کریں گے، وقت کے ساتھ اگرکسی کا نام ای سی ایل میں ڈالنا یا گرفتارکرنا ہوا توکریں گے۔

ان کا کہنا تھا کہ الیکشن کمیشن کا فیصلہ، اگرچوہا نکلا ہے تو پھر کیا چوہے کے خلاف احتجاج کر رہے ہیں، جیسے جیسے انہوں نے فیصلہ پڑھا پھر انہوں نے احتجاج کا فیصلہ کیا، کابینہ چاہے تو پی ٹی آئی کو فارن ایڈڈ پارٹی قراردے سکتی ہے، سپریم کورٹ صرف 3 رکنی بنچ ہی ہے، ریفرنس دائرکریں گے تو استدعا ہو گی اسے فل کورٹ بنچ سنے۔

واضح رہے کہ رہے کہ پاکستان تحریک انصاف نے فارن فنڈنگ کیس سے قبل ہی الیکشن کمیشن کے دفتر کے باہر جمعرات کو احتجاج کی کال دے رکھی ہے، تحریک انصاف کا کہنا ہے کہ چیف الیکشن کمشنر جانبداری کا مظاہرہ کر رہے ہیں۔