وزیراعظم کا خیبرپختونخوا میں سیلاب سے متاثرہ علاقوں کا دورہ، صوبائی حکومت کی تعریف

تفصیلات کے مطابق  وزیرِ اعظم شہباز شریف سیلاب سے متاثرہ علاقوں کا جائزہ لینے کے لیے  ٹانک پہنچے ، مولانا فضل الرحمٰن، امیر مقام اور مولانا اسعد محمود بھی وزیرِ اعظم کے ہمراہ  تھے۔

اس موقع پر وزیرِ اعظم شہباز شریف کو سیلاب سے متاثرہ علاقوں اور ریلیف کے کاموں سے متعلق بریفنگ دی گئی ۔  بریفنگ میں بتایا گیا کہ بارشوں  کے باعث آنےوالے سیلابی ریلے سے فصلیں متاثر،کئی گھرتباہ ہوئے  ، ایف سی،پاکستان آرمی،پولیس،ریسکیو1122نےامدادی کاموں میں حصہ لیا ، متاثرین میں کھانا تقسیم کیاگیا ، 3میڈیکل کیمپ بھی قائم کئےگئے جبکہ  پانی سے پیداہونےوالی بیماریوں کیلئے خاص طورپرادویات فراہم کی گئیں۔ 

وزیرِ اعظم نے خطاب کرتے ہوئے کہا کہ  ہمیں مل کر سیلاب متاثرین کی بحالی کیلئے کام کرناہے، کےپی حکومت سیلاب متاثرین کیلئےامدادی رقم میں اضافہ کرے ، ٹانک روڈ وفاقی حکومت بنا کر دے گی۔

وزیرِ اعظم نے کہا کہ کے پی حکومت امدادی رقم 8 سے 10 لاکھ روپے کرے تو بہتر ہے۔ بلوچستان حکومت بھی سیلاب سے جاں بحق افراد کے لواحقین کو 10 لاکھ روپے دے رہی ہے ۔ سیلاب سے مکمل تباہ گھر کے مالک کو 5 لاکھ اور جزوی متاثر گھر کو 2 لاکھ روپے دے رہے ہیں۔

متاثرہ علاقوں کا دورہ مکمل کر کے ایک دو روز میں صوبائی حکومتوں کے ساتھ میٹنگ کریں گے ۔ انہوں نے مزید کہا ہے کہ سیلاب متاثرین کے لیے سب مل کر کام کر رہے ہیں، اسی یکسوئی کی ضرورت ہے۔