حکومت کا تحریک انصاف کے خلاف ڈکلیئریشن سپریم کورٹ بھیجنے کا فیصلہ

اسلام آباد میں کابینہ اجلاس کے بعد میڈیا سے گفتگو میں مریم اورنگزیب نے کہا کہ تحریک انصاف نے16 اکاونٹس ڈکلیئر نہیں کیے، یہ اکاؤنٹس عمران خان سمیت سینئر قیادت کے نام پر کھلے، الیکشن کمیشن کا فیصلہ پی پی او 2002ء اور الیکشن ایکٹ 2017ء کے مطابق آیا، حکومت تحریک انصاف کے خلاف پولیٹیکل پارٹیز آرڈر 2002ء اور پولیٹیکل پارٹیز ایکٹ 2017ء کے تحت کارروائی کرنے کی پابند ہے۔

انہوں نے کہا کہ تحریک انصاف فارن فنڈڈ پارٹی ڈکلیئر ہو چکی ہے، 8 سال کے دوران تحریک انصاف نے کوئی جواب نہیں دیا، اسٹیٹ بینک نے تمام ریکارڈ فراہم کیا، وزیر قانون نے آئینی و قانونی پہلوؤں پر کابینہ کو مفصل بریفنگ دی،  ایف آئی اے کو فوری طور پر انکوائری شروع کرنے کی ہدایت کر دی گئی ہے، اسٹیٹ بینک اور ایف بی آر سمیت تمام ادارے فیصلے کی روشنی میں انکوائری کریں گے۔

مریم اورنگزیب نے بتایا کہ ہیلی کاپٹر حادثے میں افواج پاکستان کے افسران و اہلکار شہید ہوئے ہیں، شہدا بلوچستان میں سیلاب سے متاثرہ علاقوں میں امدادی سرگرمیاں انجام دے رہے تھے، آج بھی سیلاب سے متاثرہ افراد کی فوری امداد کی ہدایت کی ہے، کابینہ اجلاس میں این ڈی ایم اے اور پی ڈی ایم اے کی کارروائیوں کو سراہا گیا جبکہ متاثرہ علاقوں میں نقصانات کے سروے کے لیے مفتاح اسماعیل کی سربراہی میں کمیٹی تشکیل دی گئی ہے۔