حکومت نے سیلاب متاثرین کیلئے فلڈ ریلیف کیش پروگرام کا آغاز کر دیا

وزیر اعظم شہباز شریف کے ٹوئیٹر ہینڈل سے جاری پیغام کے مطابق سیلاب متاثرین کے لیے فلڈ ریلیف کیش پروگرام کا آغاز کر دیا گیا ہے۔

جاری پیغام میں کہا گیا ہے کہ ملک بھر کے 15 لاکھ سیلاب متاثرہ خاندانوں کو فوری طور پر 25 ہزار کیش امداد کی فراہمی شروع کر دی گئی ہے۔

کہا گیا کہ تباہی کی شدت کو سامنے رکھتے ہوئے امدادی رقوم کی تقسیم کا آغاز بلوچستان کے سیلاب متاثرین سے کیا گیا ہے، فلڈ ریلیف کیش پروگرام کے تحت 37.2 ارب روپے 90 لاکھ افراد تک فوری طور پر پہنچائے جارہے ہیں۔

ٹوئیٹر پیغام میں مزید کہا گیا کہ امدادی رقم مشترکہ سروے کے بعد جانی و مالی نقصان کی مد میں دی جانے والی رقم کے علاوہ ہے۔

فلڈ ریلیف کیش پروگرام کے تحت 37.2 ارب روپے 90 لاکھ افراد تک فوری طور پر پہنچائے جارہے ہیں. یہ امدادی رقم مشترکہ سروے کے بعد جانی و مالی نقصان کی مد میں دی جانے والی رقم کے علاوہ ہے. سیلاب متاثرین کی مدد و بحالی ہمارا قومی مشن ہے.

— Shehbaz Sharif (@CMShehbaz) August 19, 2022

واضح رہے کہ نیشنل ڈیزاسٹر مینیجمنٹ اتھارٹی کی جانب سے جاری اعداد و شمار کے مطابق سیلاب کی وجہ سے گزشتہ 2 ماہ کے دوران 649 اموات ہو چکی ہیں اور ملک کے 103 اضلاع متاثر ہوئے ہیں۔