ٹوئٹر نے نئے ویڈیو فیچر کی آزمائش شروع کردی

مقامی میڈیا کے مطابق  مائیکرو بلاگنگ سائٹ ٹوئٹر جلد ایک نئے فیچر کو اپنی ایپلی کیشن میں شامل کرنے جار ہا ہے۔اس فیچر کے ذریعے صارفین ٹوئٹر کی ٹائم لائن پر  ہی یوٹیوب ویڈیوز دیکھ سکیں گے۔

اس فیچر کے بعد  یوٹیوب ویڈیوز دیکھنے کیلئے ٹوئٹر صارفین کو الگ سے یوٹیوب ایپ پر ری ڈائریکٹ نہیں کیا جائے گا اور  اس سے صارفین کے لیے ٹوئٹر پر ویڈیو دیکھنا بہت آسان ہوگا۔

فی الحال  ٹوئٹر کے نئے فیچر کا تجربہ  امریکا ، جاپان ، کینیڈا اور سعودی عرب میں کیا جارہا ہے۔

ٹوئٹر انتظامیہ کے ترجمان کے مطابق  چار ہفتوں کے لیے نئے فیچر کی جانچ کی جائے گی اور نتائج کی بنیاد پر ، اس کو لانچ کیا جائے گا۔

واضح رہے کہ  ٹوئٹر نے گزشتہ دنوں  ٹوئٹر سپورٹ نامی ٹوئٹر ہینڈل کے ذریعے بتایا تھا کہ  ٹوئٹر اپنے اینڈرائیڈ اور آئی اوایس صارفین کے لیے دو نئے فیچرز کی آزمائش کررہی ہے جس کے تحت صارفین اپنے ٹوئٹر ٹائم لائن پر اب   آدھی کے بجائے مکمل تصویر دیکھ سکیں گے جب کہ دوسرا فیچر 4k امیج بھی سپورٹ کرسکے گا۔