اسلام آباد ہائیکورٹ : عمران خان کی عبوری ضمانت25 اگست تک  منظور 

جی این این کے مطابق  اسلام آباد ہائیکورٹ  کے ڈویژن جسٹس بنچ محسن اختر کیانی اور جسٹس بابر ستار نے عمران خان کی عبوری ضمانت کی درخواست پر سماعت کی ۔  عدالت نے تین دن کی حفاظتی ضمانت منظور کر تے ہوئے پی ٹی آئی چئیرمین  کو 25  اگست سے قبل انسداد دہشت گردی کی عدالت میں پیش ہونے کا حکم دیا ۔

سابق وزیراعظم عمران خان کی جانب سے دہشت گردی کی دفعات کے تحت درج مقدمے میں ضمانت قبل از وقت گرفتاری کی درخواست پر رجسٹرار آفس نے اعتراضات لگاتے ہوئے درخواست آج ہی سماعت کے لیے مقرر کی تھی۔ 

رجسٹرار آفس نے بائیو میٹرک نہ کرانے سمیت تین اعتراضات عائد کیے تھے تاہم عدالت نے  دائر اعتراضات بھی ختم کردیے ۔ 

اس سے قبل پاکستان تحریک انصاف (پی ٹی آئی) کے چیئرمین عمران خان نے ممکنہ گرفتاری سے بچنے کے لیے عدالت  سے رجوع کیا تھا۔

عدالت میں ضمانت  قبل ازگرفتاری کی  درخواست وکیل بابر اعوان اور فیصل چوہدری کے ذریعے  دائر کی گئی ۔  دائر درخواست میں موقف اپنایا گیا  کہ چیئرمین پی ٹی آئی کے خلاف گزشتہ روز دہشت گردی کا مقدمہ درج کیا گیا لیکن درخواست گزار کا ماضی کا کوئی کرمنل ریکارڈ بھی نہیں ہے ۔ درخواست میں استدعا کی گئی ہے کہ عدالت ضمانت قبل از گرفتاری کی درخواست منظور کرے ، کیس میں شامل تفتیش ہونے کے لیے تیار ہوں۔

خیال رہے کہ سابق وزیر اعظم و چیئرمین پاکستان تحریک انصاف (پی ٹی آئی) عمران خان کے خلاف اعلیٰ سرکاری افسران کو دھمکیاں دینے کے خلاف انسداد دہشت گردی ایکٹ کے تحت اسلام آباد میں مقدمہ درج کیا گیا ہے ۔ 

پولیس ایف آئی آر کے مطابق گزشتہ روز اسلام آباد کے علاقے صدر کے مجسٹریٹ علی جاوید کی مدعیت میں عمران خان کے خلاف اسلام آباد کے تھانہ مرگلہ میں انسداد دہشت گردی ایکٹ کے تحت مقدمہ درج کیا گیا۔ 

دوسری جانب  پی ٹی آئی  سربراہ عمران خان کے خلاف انسداد دہشت گردی ایکٹ کے خلاف ایف آئی آر کے اندراج کے بعد متوقع گرفتاری کے پیش نظر پارٹی کارکنان کی بڑی تعداد رات سے بنی گالہ میں موجود ہیں ۔