نیویارک میں دوسرے مرحلے کے پرائمری انتخابات 23 اگست کو ہونگے

ریاست نیویارک میں دوسرے مرحلے کے  پارٹی پرائمری انتخابات 23 اگست بروز منگل کو ہو رہے ہیں. جس میں کانگریس کے ایوان نمائندگان کے اراکین اور سٹیٹ سئنٹرز کا پارٹی چناؤ عمل میں لایا جائے گا.

بعدازاں ڈیموکریٹک اور ری پبلکن پارٹی کی پرائمریز میں منتخب ہونے والوں کے آپس میں فائنل مڈٹرم انتخابات رواں سال 8 نومبر کو ہوں گے. نیویارک کے علاوہ امریکی ریاست فلوریڈا میں بھی 23 اگست کو پرائمری انتخابات ہو رہے ہیں. جبکہ زیادہ تر امریکی ریاستوں میں پرائمری چناؤ کا مرحلہ مکمل ہو چکا ہے. نیویارک میں پولنگ کے اوقات صبح 6 بجے سے رات 9 بجے تک ہوں گے. 

ریاست نیویارک میں ووٹروں کی سہولت کے لیے 23 اگست کو ہونے پرائمری انتخابات سے ایک ہفتہ پہلے، کووڈ-19 کی وجہ سے قبل از وقت (ارلی) ووٹنگ 13 اگست سے 21 اگست تک جاری رہی. تاہم اس دوران ووٹ ڈالنے کی شرح نسبتاً کم رہی. 

واضح رہے کہ ریاست نیویارک میں پہلے مرحلے کے پرائمری انتخابات رواں سال 28 جون کو ہو چکے ہیں، جس میں نیویارک کے گورنر، لیفٹیننٹ گورنر، ارکان سٹیٹ اسمبلی، ریاستی ججز اور پارٹی عہدیداروں کے لیے ووٹ ڈالے گئے تھے.