سعودی عرب کی پاکستان میں ایک ارب ڈالرز کی سرمایہ کاری کی یقین دہانی

یہ یقین دہانی وزیر خارجہ بلاول بھٹو زرداری سے سعودی ہم منصب فیصل بن فرحان نے ٹیلی فونک بات چیت کے دوران کرائی۔

وزیر خارجہ بلاول بھٹو اور سعودی عرب کے وزیر خارجہ فیصل بن فرحان کے درمیان ہونے والی ٹیلی فونک گفتگو میں دو طرفہ برادرانہ تعلقات کے فروغ پر تبادلہ خیال کیا گیا۔

چیئرمین پاکستان پیپلزپارٹی بلاول بھٹو نے اپنے سعودی ہم منصب کی جانب سے کرائی یقین دہانی پر ان کا شکریہ ادا کیا۔ وزیر خارجہ بلاول بھٹو نے سعودی ہم منصب کو پاکستان میں سیلاب سے ہونے والی تباہ کاریوں سے آگاہ کیا اور بدترین سیلابی صورت حال کے حوالے سے اظہار یکجہتی پر سعودی عرب سے اظہار تشکر بھی کیا۔

واضح رہے کہ گزشتہ روز قطر کی جانب سے پاکستان میں تین ارب ڈالرز کی سرمایہ کاری کا اعلان کیا گیا ہے جب کہ اس سے قبل یو اے ای کی جانب سے بھی ایک ارب ڈالرز کی پاکستان میں سرمایہ کاری کا اعلان کیا جا چکا ہے۔