اپنی زندگی میں اس طرح کا سیلاب نہیں دیکھا، دریاکےکنارےقائم گھر اور ہوٹل دریا برد ہوگئے:وزیراعظم

بلوچستان کے سیلاب سے متاثرہ علاقوں کا دورہ کرتے ہوئے وزیر اعظم شہباز شریف نے جعفرآباد، جھل مگسی اور  دیگر علاقوں کا فضائی جائزہ بھی لیا۔

سیلاب زدہ علاقوں کے دورے کے بعد گفتگو کرتے ہوئے شہباز شریف کا کہنا تھا کہ 2010ء کاسیلاب سندھ اور ملحقہ علاقوں تک محدود تھا لیکن اس بار  پانی چاروں طرف پھیلاہوا ہے، اپنی زندگی میں اس طرح کا سیلاب نہیں دیکھا، دیہات کے دیہات صفحہ ہستی سے مٹ گئے ہیں۔

انہوں نے کہا کہ سیلاب سے سندھ اور بلوچستان سب سے زیادہ متاثر ہوئے ہیں جبکہ سوات، دیر، کالام بارش سے تباہی کا شکار ہوگئے ہیں، ایک ہزار لوگ اللہ کو  پیارے ہوگئے، ہزاروں زخمی ہوگئے۔

انہوں نے قوم سے اپیل کی کہ کروڑوں بھائی اور  بچے امداد کے منتظر ہیں، ان کا ہاتھ تھامیں  اور کہا کہ ایک شخص نےکل رات 6کروڑ  روپے دیے اور کہا کہ نام نہ بتایاجائے، ایک گروپ نے 45کروڑ روپے اکاؤنٹ میں جمع کروائے ہیں، لاکھوں پاکستانی اپنی مدد آپ پانی اور خوراک پہنچا رہے ہیں۔

وزیر اعظم کا کہنا تھا کہ وفاقی حکومت ہر خاندان کو 25 ہزار روپے  دے رہی ہے، این ڈی ایم اے اور بینظیر انکم سپورٹ کے ذریعے امداد تقسیم کر رہےہیں، ایک ہفتے میں 25 ارب روپے متاثرین میں تقسیم ہوں گے، نقصانات کا مزید تخمینہ لگایا جا رہا ہے۔