سیلاب زدگان کیلئے امدادی پروازوں کی آمد کا سلسلہ جاری

دفتر خارجہ کے مطابق  سیلاب متاثرین کے لیے امدادی سامان لے کر 4 مزید پروازیں پاکستان پہنچ گئیں ۔  امدادی سامان لانے والی پہلی دو پروازیں  متحدہ عرب امارات سے کراچی ائرپورٹ  پہنچیں ۔

پاکستان اور متحدہ عرب امارات کے درمیان انسانی ہمدردی کی بنیاد پر قائم کیے گئے فضائی پل کے تسلسل میں متحدہ عرب امارات سے سیلاب زدگان کے لئے اب تک مجموعی طور پر 43 پروازیں خوراک، طبی سامان اور خیمے لے کر پاکستان پہنچی ہیں۔ 

دفتر خارجہ کے مطابق  سیلاب زدگان کے لئے متحدہ عرب امارات سے اب تک 43، ترکیہ سے 13، چین سے 4، ازبکستان سے ایک، قطر سے چار، فرانس سے ایک، یونیسیف کی دو، اقوام متحدہ کے پناہ گزینوں کے ادارہ ( یو این ایچ سی آر) کی 9 ، ترکمانستان سے ایک، اردن کی ایک، عالمی ادارہ خوراک کی تین، امریکہ کی 15، نیپال کی ایک اور سعودی عرب کی دو پروازیں امدادی سامان لیکر پاکستان پہنچی ہیں۔

واضح رہے کہ ملک بھر میں حالیہ بارشوں اور  سیلاب سے اموات کی تعداد ایک ہزار 486  تک جاپہنچی ہے جبکہ  زخمى افراد کی مجموعی تعداد 12 ہزار 749 ہو گئى۔

این  ڈی  ایم اے کے جاری کردہ اعداد و شمار کے مطابق ملک بھر میں 12ہزار718 کلو ميٹر سڑکیں  بارشوں اور سيلاب سے متاثر ہو چکی ہیں جبکہ 9 لاکھ 18 ہزار 473 مويشيوں کو نقصان پہنچا۔

ملک بهر میں 80 اضلاع بارشوں اور سيلاب سے تاحال متاثر ہيں۔ جبکہ مجموعی طور پر 3 کروڑ 30 لاکھ 46 ہزار 329 افراد بارشوں سے متاثر ہوئے۔