وزیراعظم ہاؤس میں اجلاس کی مبینہ آڈیو لیک‘ پی ٹی آئی ارکان کے استعفوں سے متعلق اہم گفتگو سامنے آگئی

 وزیراعظم ہاؤس میں اجلاس کی مبینہ آڈیو لیک ہوگئی، جس میں پی ٹی آئی ارکان کے استعفوں سے متعلق اہم گفتگو سامنے آگئی، آڈیو میں مبینہ طور پر وزیراعظم شہباز شریف،

وزیر داخلہ رانا ثنااللہ، وزیر دفاع خواجہ آصف اور سابق اسپیکر قومی اسمبلی سردار ایاز صادق سمیت دیگر رہنماؤں کی آوازیں ہیں، لیک آڈیو میں پی ٹی آئی ارکان کے استعفوں کی منظوری کے لیے لندن سے اجازت لینے پر بھی گفتگو کی گئی۔ 

 ایک مبینہ آڈیو ٹیپ میں پاکستان تحریک انصاف کے مستعفی ارکان کے استعفوں سے متعلق حتمی منظوری لندن سے لیے جانے کا انکشاف ہوا ہے،

لیک ہونے والی مبینہ آڈیو لیک میں ایک نامعلوم شخص کو کہتے ہوئے سنا جاسکتا ہے کہ تیس تیس ارکان کو نوٹس دے رہے ہیں، جس پر ایاز صادق نے کہا ہم لسٹ بنا کر دیں گے کہ کس کس کو ملنا ہے، اس کی اپروول لیڈرشپ دے گی۔ 

انہوں نے کہا کہ 6 تاریخ کوجن 30 لوگوں نے پیش ہونا ہے ان میں سے چھ، سات کے استعفے قبول کر لیں گے، جن کے استعفے قبول نہیں کرنے کہہ دیں گے کہ دستخط ٹھیک نہیں تھے۔

اس پر رانا ثنا اللہ نے کہا کہ وہ لوگ دوبارہ ہاؤس میں آئیں استعفے دینے، اس معاملے کو میاں صاحب سے کلیئر کروا لیں گے،

مبینہ آڈیو میں خواجہ آصف کو کہتے ہوئے سنا جاسکتا ہے کہ 6 تاریخ کے بعد ہمارے پاس اختیار ہوگا کہ کسے رکھنا ہے اور کسے نہیں جب کہ وزیر اعظم نے کہا کہ اگر اسی طرح چار یا پانچ روز نکلتے جائیں گے تو ان میں کھلبلی مچ جائے گی،

میری گزراش ہے کہ اس میں دیر نہ کریں۔