الیکشن کا مطالبہ سیلاب زدگان کی زندگیوں سے کھیلنے کے مترادف ہے :وزیرخارجہ 

تفصیلات کے مطابق واشنگٹن میں پریس کانفرنس کرتے ہوئے وزیرخارجہ بلاول بھٹو  نے کہا کہ سیلاب متاثرین کی مدد پہلا اور سیاست بعد کا کام ہے۔ پاکستان میں سیلاب متاثرین کیلئے بہت کچھ کرنا ہے  ، متاثرین کے لیے ہم جتنا بھی کریں وہ ناکافی ہے۔

انہوں نے کہا کہ امریکا کے ساتھ تعلقات میں بہتری آئی ہے،تجارت،زراعت،صحت اور دیگرشعبوں میں مزید پیشرفت کا امکان ہے،امریکا کے دورے کا اولین مقصد سیلاب متاثرین کی مدد کرنا تھا، سیکرٹری جنرل نے یواین اجلاس میں سیلاب کو سہرفہرست رکھا۔ 

بلاول بھٹو زرداری کا کہنا تھا کہ عمران خان نے ہماری خارجہ پالیسی اور معیشت کو نقصان پہنچایا۔ شکر ہے اب درست سمت میں چل رہے ہیں ،  غلطی عمران  خان کرے اور سزا اسدمجید کودوں یہ ناانصافی ہوگی ، اسدمجید اپنی ذمہ داریاں ادا کررہےہیں ، غیرذمہ دارانہ کام خان صاحب نے کیا۔ 

وزیر خارجہ نے مزید کہا کہ 6 ماہ میں پاکستان کے مختلف ممالک سے تعلقات میں بہتری ہی آئی ہے ۔ سیلاب کے علاوہ ہماراایجنڈاامریکاسے تعلقات میں بہتری لاناتھا۔ 

بلاول بھٹونے مزید کہا کہ  موسمیاتی تبدیلی کےشکار 10 بڑے ملکوں کو مل کر آواز اٹھاناہوگی ،  پاکستان اور بھارت کو موسمیاتی تبدیلی سےمتعلق مل کر کام کرنا چاہیے، موسمیاتی تبدیلی کےمسائل پر اتفاق نہ ہوا تونقصان دنیاکاہوگا ، موسمیاتی تبدیلی کا واحد حل مل کرکام کرنا ہے۔