عالمی خبر رساں ایجنسی کے مطابق آسٹریلیا کے شہر میلبرن میں کھیلے جانے والے فائنل میں جوکووچ نے یونان کے اسٹفنوس اسٹسیپاس کو اسٹریٹ سیٹس میں شکست دی۔

جوکووچ نے دسویں مرتبہ آسٹریلین اوپن کا ٹائٹل اپنے نام کیا جس کے بعد ان کے گرینڈ سلیم ٹائٹلز کی تعداد 22 ہو گئی ہے اور وہ اسپین کے رافیل نڈال کے برابر آگئے ہیں۔

واضح رہے کہ جوکووچ نے اپنے کیریئر میں اب تک 22 گرینڈ سلیم ٹائٹلز جیتے ہیں جب کہ 11 ٹورنامنٹس میں وہ رنر اپ رہے ہیں۔

یاد رہے کہ سربیا کے 35 سالہ کھلاڑی نے 10 مرتبہ آسٹریلین اوپن، 7 مرتبہ ومبلڈن، 3 مرتبہ یو ایس اوپن اور 2 مرتبہ فرنچ اوپن کا ٹائٹل جیتا ہے۔

امریکی اہلکار نے خدشہ ظاہر کیا ہے کہ ایران میں دفاعی تنصیب پر ہونے والے ڈرون حملے میں اسرائیل کے ملوث ہونے کا امکان ہے۔

برطانوی خبر رساں ادارے رائٹرز نے کہا  کہ ایک امریکی اہلکار نے نام ظاہر نہ کرنے کے شرط پر بتایا ہے کہ ایران میں ہونے والے ڈرون حملوں میں اسرائیل ملوث ہو سکتا ہے تاہم امریکی حکام نے اس حوالے سے کہا کہ اس معاملے میں امریکا کا کوئی کردار نہیں ہے۔

اسرائیل کی جانب سے بھی امریکی اہلکار کے بیان کی تصدیق یا تردید کیلئے کوئی بیان سامنے نہیں آیا نہ ہی  ایرانی وزارت دفاع نے تاحال حملوں کا الزام کسی پرعائد نہیں کیا۔

 ایرانی وزیر خارجہ حسین امیرعبداللھیان نے ایران میں دفاعی تنصیب پر حملے کو ملک میں انتشار پھیلانے کی ایک کوشش قرار دیا ہے۔ ایک ٹی وی پروگرام میں ایرانی قانون ساز اسمبلی کے رکن عبداللہ مرزئی نے کہا کہ مضبوط قیاس آرائیاں ہیں کہ حملے میں اسرائیل ملوث ہے۔

گذشتہ روز ایران کے مرکزی شہر اصفہان میں موجود ایک دفاعی تنصیب پر ہونے والے حملے کے بعد ایرانی حکام کا کہنا تھا کہ ایران نے دفاعی تنصیب پر ڈرون حملے ناکام بنا دیئے ہیں، حملے کے نتیجے میں کوئی جانی نقصان نہیں ہوا۔

اوگرا کی جانب سے جاری بیان میں کہا گیا ہے کہ ملک میں پیٹرولیم مصنوعات کی کوئی قلت نہیں، ذخیرہ اندوزوں نے مصنوعی بحران پیدا کیا، بحران پیدا کرنے والوں کے خلاف فوری کارروائی کا فیصلہ کیا ہے۔

اوگرا کا کہنا ہے کہ مصنوعی بحران پیدا کرنے والوں کے لائسنس منسوخ کیے جائیں گے، صوبائی چیف سیکرٹریز کے ذریعے ضلعی انتظامیہ کی مدد سے معاملہ جلد نمٹایا جائے گا۔

یاد رہے کہ گزشتہ چند روز سے پنجاب کے مختلف شہروں میں شہریوں کی جانب سے پیٹرولیم مصنوعات کی قلت کی خبریں سامنے آ رہی تھیں۔