بھارت : گجرات میں پُل گرنے سے اموات کی تعداد 141 ہو گئی

بھارتی میڈیا کے مطابق گزشتہ شام  بھارتی ریاست گجرات  کے شہر احمد آباد سے 200 کلومیٹر دور موربی میں میں  150 سالہ پرانے پل پر لوگ مذہبی تہوار منانے کے لیے جمع تھے کہ پل کو آپس میں جوڑنے والی کیبلز اچانک ٹوٹ گئیں ، اس وقت پل یا اس کے ارد گرد 500 افراد موجود تھے جو مچھو دریا میں جا گرے۔ 

بھارتی میڈیا کے مطابق  حادثے میں زخمی افراد کی حالت تشویشناک ہے جبکہ  177 افراد کو بچا لیا گیا ہے ۔  پل حادثے میں لاپتہ افراد کی تلاش تاحال  جاری ہے جبکہ پولیس چیف کا کہنا ہے کہ  ہلاکتوں کی تعداد زیادہ ہو سکتی ہے۔

دوسری جانب گجرات کی حکومت نے پل گرنے کی ذمہ داری قبول کر لی ہے ۔

گجرات کے وزیر اعلی بھوپیندر پٹیل نے حادثے میں ہلاک ہونے والوں کے لواحقین کے لیے 4 لاکھ روپے اور زخمیوں کے لیے 50 ہزار روپے کی امداد کا اعلان کیا ہے۔

سو سال سے زیادہ قدیم پل کو کچھ عرصہ ٹریفک کے لیے بند کر دیا گیا تھا تاہم پل کو مرمت اور تزئین و آرائش کے بعد چار دن قبل کھولا گیا۔