برطانوی حکومت کا 16 سال سے کم عمر بچوں پر سوشل میڈیا پابندی کاعندیہ

لندن:ـبرطانوی حکومت نے 16 سال سے کم عمر بچوں کے لیے سوشل میڈیا پر پابندی عائد کیے جانے کا عندیہ دے دیا۔

برطانوی خبر رساں ادارے رائٹرز کے مطابق برطانیہ کی حکومت 16 سال سے کم عمر بچوں کے لیے سوشل میڈیا کے استعمال پر پابندی عائد کرنے پر غور کر رہی ہے اور امکان ہے کہ اس سلسلے میں قانون سازی رواں سال ہی مکمل کر لی جائے۔

میڈیا رپورٹس کے مطابق برطانوی وزیراعظم کیئراسٹارمر کی حکومت نے گزشتہ ماہ اس حوالے سے عوامی مشاورت کا آغاز کیا تھا۔ حکام کے مطابق قانون میں ضروری ترامیم کر کے مشاورت مکمل ہونے کے چند ماہ کے اندر نئے قواعد نافذ کیے جا سکتے ہیں۔

دوسری جانب ٹیکنالوجی امور کی وزیرلزکینڈل کا کہنا ہے کہ 2023 کے آن لائن سیفٹی ایکٹ کے باوجود کچھ اے آئی چیٹ بوٹس ایک قانونی خلا کے باعث حفاظتی دائرہ کار سے باہر ہیں، خاص طور پر وہ سسٹمز جو صارفین سے ون آن ون بات چیت کرتے ہیں۔ حکومت اس خلا کو بند کرنے کے لیے قانون میں ترمیم کرے گی۔

حکام کے مطابق بعض بچوں کی جانب سے اے آئی سسٹمز کے ساتھ غیر محفوظ نوعیت کے تعلقات قائم کرنے کے خدشات سامنے آئے ہیں، جس کے باعث نگرانی مزید سخت کرنے کی ضرورت محسوس کی گئی۔

خیال رہے کہ اس سے قبل آسٹریلیا نے بھی سولہ سال سے کم عمر بچوں پر سوشل میڈیا کے استعمال پر پابندی عائد کی ہے ، جو اس نوعیت کی پابندی نافذ کرنے والا پہلا ملک بنا تھا۔