تحریک انصاف کے لانگ مارچ کا ساتواں روز ، کوٹ خضری سے سفر شروع ہوگا

جی این این کے مطابق عمران خان کی قیادت میں لانگ مارچ وزیر آباد میں کوٹ خضری سے شروع ہوگا ،  عمران خان کا پہلا خطاب کوٹ خضری  جبکہ دوسرا مولانا ظفر علی خان چوک پر ہوگا ۔

چئیرمین تحریک انصا ف کے استقبال کی تیاریاں جاری ہیں ۔ عمران خان کےاولڈ کچہری چوک پر خطاب کے بعد آج کا مارچ وزیر آباد میں ختم ہوگا ۔ 

عمران خان آج سارا دن وزیرآباد گزاریں گے،  مرکزی خطاب کے لیے پرانی کچہری چوک میں تشہیری بورڈز، بینرز اور سٹکرز بڑی تعداد میں لگائے گئے ہیں۔ 

وزیرآباد شہر بھر اور اندرون و بیرون جی ٹی روڈ کو پارٹی پرچموں سے سجا دیا گیا ہے۔

تحریک انصاف کی مقامی قیادت، کارکنوں اور عہدیداروں کو استقبالیہ کیمپس میں گیارہ بجے تک پہنچنے کی ہدایات جاری کی گئی ۔

کل دوبارہ لانگ مارچ کا آغاز گجرات سے ہوگا  ۔ 

یا د رہے کہ عمران خان نے پہلے روز لبرٹی چوک لاہور سے داتا دربار تک ، دوسرے روز شاہدرہ سے فیروز والہ تک تیسرے روز مرید کے سے سادھوکی  تک لانگ مارچ کی قیادت کی ۔

تحریک انصاف کے چیئرمین نے چوتھے روز کامونکی موڑ ایمن آباد اور گوجرانوالہ میں چن دا قلعہ تک عمران خان نے لانگ مارچ کی قیادت کی  ۔  پانچویں روز عمران خان نے چن دا قلعہ سے گوندلانوالہ چوک  اورپھر  چھٹے روز لانگ مارچ پنڈی بائی پاس سے گکھڑ منڈی تک آیا ۔

تحریکِ انصاف کے سربراہ عمران خان نے کہا ہے کہ ان کی یہ تحریک اسلام آباد پہنچ کر ختم نہیں ہو گی بلکہ دس ماہ تک جب تک الیکشن ہو نہیں جاتے چلتی رہے گی۔

تحریک انصاف کے رہنما اسد عمر کے مطابق لانگ مارچ کے نئے شیڈول کے تحت عمران خان 10 نومبر کو راولپنڈی پہنچیں گے جبکہ 11 نومبر کو اسلام آباد کا رخ کیا جائے گا۔

تحریک انصاف کا یہ لانگ مارچ شیڈول کے تحت براستہ گوجرانوالہ، وزیر آباد، گجرات، جہلم، گوجر خان اور راولپنڈی، اسلام آباد پہنچے گا۔ 

دوسری جانب اسلام آباد میں جلسے اور دھرنے کی اجازت نہ دیے جانے پر اسلام آباد ہائی کورٹ نے وفاقی دارالحکومت کی انتظامیہ کو نوٹس جاری کر دیے ہیں۔