عمران خان کا علاج جاری ، تمام میڈیکل رپورٹس تسلی بخش قرار 

جی این این کے مطابق سابق وزیراعظم ، چئیرمین تحریک انصاف عمران خان  کی ٹانگ کی  سرجری رات ڈیڑھ گھنٹہ تک جاری رہی جس کے بعد عمران خان کو پرائیویٹ روم میں منتقل کر دیا گیا۔

شوکت خانم ہسپتال میں زیر علاج رات گئے عمران خان کے سٹی سکین، ایکسرے و دیگر ٹیسٹ کیے گئے ۔ ڈاکٹرز نے عمران خان کی تمام میڈیکل رپورٹس کو تسلی بخش قرار دے دیا ۔

اس حوالے سے اسپتال انتظامیہ کا کہنا ہے کہ  عمران خان کی حالت خطرے سے باہر ہے ، ڈاکٹرز نے عمران خان کو حرکت کرنے اور ٹوائلٹس استعمال کرنے کی اجازت بھی  دے  دی ہے ،  عمران خان کی  مزید ٹیسٹنگ کی ضرورت نہیں  ، نہ ہی انہیں کھانے پینے میں  کسی پرہیز کی ضرورت ہے ۔

اسپتال انتظامیہ کے مطابق عمران خان آج ہی ڈسچارج کرنے پر بضد مگر ڈاکٹرز نے ایک روز آرام کا مشورہ دیا ہے ۔

دوسری جانب پی ٹی آئی کے سینکڑوں کارکنوں نے اپنے قائد عمران خان سے اظہارِ یک جہتی کے لیے شوکت خانم اسپتال کے باہر گلدستے رکھ دیے۔

واضح رہے کہ عمران خان گزشتہ روز وزیر آباد میں لانگ مارچ کے دوران فائرنگ سے زخمی ہوئے تھے۔واقعے میں ایک شخص جاں بحق اور پی ٹی آئی چیئرمین و دیگر رہنماؤں سمیت 13 افراد زخمی ہوئے تھے۔فائرنگ کرنے والے شخص کو بعد میں کنٹینر کے قریب سے پکڑ لیا گیا جس نے عمران خان پر فائرنگ کا اعتراف بھی کیا۔