ایپسٹین فائلز: برطانوی بادشاہ چارلس کے  بھائی شہزادہ اینڈریو گرفتار

لندن :برطانوی بادشاہ چارلس کے بھائی شہزادہ اینڈریو کو سرکاری عہدے میں بدعنوانی کے شبے میں گرفتار کرلیا گیا۔

برطانوی میڈیا کے مطابق پولیس مشرقی انگلینڈ میں واقع اینڈریو کی رہائش گاہ پہنچی، جہاں 6 بغیر نشان والی پولیس کی گاڑیاں دیکھی گئیں، آج صبح سینڈرنگھم سٹیٹ میں واقع رہائش گاہ پر 8 سادہ لباس اہلکار بھی پہنچے تھے۔

برطانوی میڈیا کامزید کہنا ہے کہ پولیس نے رواں ماہ اعلان کیا تھا کہ وہ الزامات کا جائزہ لے رہی ہے، رپورٹس کے مطابق اینڈریو پر جنسی مجرم جیفری ایپسٹین کو خفیہ سرکاری دستاویزات فراہم کرنے سے متعلق الزامات کا جائزہ لیا جا رہا تھا۔

اس حوالے سے برطانوی وزیراعظم سر کیئر اسٹارمر کا کہنا ہے کہ قانون سے کوئی بالاتر نہیں، اصول بہت اہم ہیں ان کا اطلاق اس کیس میں بھی ہونا چاہیے، اطلاق ویسے ہی ہونا چاہیے جیسے کسی دوسرے کیس میں ہوتا ہے۔

انہوں نے کہا کہ ملک کے بنیادی اصول ہیں کہ قانون سب  کے لیے برابر ہے اور کوئی بھی اس سے بالاتر نہیں، ارکان پارلیمنٹ اینڈریو کے معاملے پر بحث کرنا چاہیں تو ہم راستے میں کھڑے نہیں ہوں گے۔

تاہم دوسری جانب اینڈریو ماؤنٹ بیٹن ونڈزر نے کسی بھی غلط کام سے انکار کیا ہے، تاہم انہوں نے ایپسٹین سے دوستی پر افسوس کا اظہار کیا تھا۔ 

ایپسٹین فائلز کی حالیہ کھیپ سامنے آنے کے بعد اینڈریو نے تبصرے کی درخواستوں کا کوئی جواب نہیں دیا، جبکہ معاملے کی مزید تحقیقات جاری ہیں۔