طالبات میں ویسٹ مینجمنٹ سے متعلق شعور اجاگر کرنا ہماری ترجیح ہے، طارق علی نظامانی

کراچی: سندھ سالڈ ویسٹ مینجمنٹ بورڈ کے سوشل موبلائزیشن پروگرام کے تحت گورنمنٹ گرلز سیکنڈری اسکول، کورنگی 6 میں ایک پروقار آگاہی تقریب کا انعقاد کیا گیا، جس کا مقصد طالبات میں صفائی ستھرائی اور ویسٹ مینجمنٹ سے متعلق شعور اجاگر کرنا تھا۔

تقریب کا آغاز تلاوتِ کلامِ پاک سے کیا گیا۔ اس موقع پر سندھ سالڈ ویسٹ مینجمنٹ بورڈ کی ٹیم نے طالبات کو کچرے کی درست تلفی اور انتظام، صفائی کی اہمیت اور اپنے ماحول کو صاف رکھنے میں ہر فرد کے کردار سے متعلق آگاہی فراہم کی۔

پروگرام کے دوران طالبات نے تقاریر، ٹیبلوز، رول پلے اور ملی نغموں کے ذریعے اپنی صلاحیتوں کا شاندار مظاہرہ کیا اور صفائی کے پیغام کو مؤثر اور دلکش انداز میں پیش کیا۔ مزید برآں طالبات کی جانب سے کچرے سے تیار کردہ مختلف تخلیقی اور کارآمد اشیاء کی نمائش بھی کی گئی، جسے شرکاء نے بے حد سراہا۔

اساتذہ کرام نے بھی اپنے خیالات کا اظہار کرتے ہوئے صاف ستھرے ماحول کی اہمیت کو اجاگر کیا اور کہا کہ تعلیمی ادارے نئی نسل میں مثبت اور ذمہ دارانہ رویوں کے فروغ میں اہم کردار ادا کرتے ہیں۔

اس موقع پر مینیجنگ ڈائریکٹر سندھ سالڈ ویسٹ مینجمنٹ بورڈ، طارق علی نظامانی نے بطور مہمانِ خصوصی شرکت کی۔ انہوں نے طالبات کے اعتماد، تخلیقی صلاحیتوں اور ماحول دوست سوچ کو سراہتے ہوئے کہا کہ طلبہ و طالبات معاشرے میں مثبت تبدیلی کے حقیقی سفیر ہیں۔ انہوں نے کہا کہ سندھ سالڈ ویسٹ مینجمنٹ بورڈ تعلیمی اداروں میں آگاہی کے ذریعے نئی نسل کو صفائی کی اہمیت سے روشناس کر رہا ہے تاکہ ایک صاف، صحت مند اور مثالی معاشرہ تشکیل دیا جا سکے۔

انہوں نے ماہِ رمضان کی آمد پر مبارکباد دیتے ہوئے کہا کہ رمضان المبارک ہمیں پاکیزگی، صفائی اور نظم و ضبط کا درس دیتا ہے۔ اس بابرکت مہینے میں ہمیں اپنے اردگرد کے ماحول کو مزید صاف ستھرا رکھنے کے لیے اجتماعی کردار ادا کرنا چاہیے۔

بعد ازاں مینیجنگ ڈائریکٹر سندھ سالڈ ویسٹ مینجمنٹ بورڈ کی جانب سے اسکول کے احاطے میں پودا بھی لگایا گیا، جس کا مقصد ماحولیاتی تحفظ اور سرسبز ماحول کے فروغ کے عزم کا اظہار تھا۔

تقریب کے اختتام پر طالبات اور اساتذہ نے سندھ سالڈ ویسٹ مینجمنٹ بورڈ کی کاوشوں کو سراہتے ہوئے اس عزم کا اظہار کیا کہ وہ صفائی کو اپنی روزمرہ زندگی کا مستقل حصہ بنائیں گے۔