پی ٹی آئی رہنماؤں کیخلاف مقدمات درج

اسلام آباد اور راولپنڈی کی حدود فیض آباد اور اس کے اطراف میں احتجاج کرنے والے پی ٹی آئی کے کارکنان کو پولیس نے گرفتار کر کے مقدمات درج کر لیے۔ تھانہ آئی نائن پولیس نے 2 الگ الگ مقدمات درج کیے۔

ڈپٹی اسپیکر پنجاب اسمبلی واثق قیوم اور عامر کیانی کے خلاف بھی مقدمہ درج کیا گیا ہے جبکہ 250 سے زائد پی ٹی آئی کارکنان کے خلاف مقدمہ درج کیا گیا ہے۔ درج کیے گئے دونوں مقدمات پولیس کی مدعیت میں درج کیے گئے ہیں۔

درج کیے گئے مقدمے کے متن کے مطابق فیض آباد اور آئی جے پی روڈ پر پی ٹی آئی کارکنان نے مظاہرہ کیا۔ مظاہرین نے ایف سی اور اسلام آباد پولیس پر پتھراؤ کیا جبکہ مظاہرین کی جانب سے موٹرسائیکلیں جلائی اور املاک کو نقصان پہنچایا گیا۔

واضح رہے کہ گزشتہ روز فیض آباد میں پی ٹی آئی کے سیکڑوں کارکنان نے جمع ہو کر احتجاج کیا تھا جو رات گئے تک جاری رہا۔ پولیس نے مظاہرین کو منتشر کرنے کے لیے شیلنگ بھی کی۔

مظاہرین نے اسلام آباد میں داخل ہونے کی بھی کوشش کی تاہم پولیس کی جانب سے انہیں روکا گیا۔