عظیم قومی شاعر ڈاکٹر علامہ محمد اقبال کا 145واں یوم پیدائش 

شاعر مشرق ڈاکٹر علامہ محمد اقبال 9نومبر 1877کو سیالکوٹ میں پیدا ہوئے ۔  ان کے والد کا نام شیخ نور محمد تھا، انھوں نے ابتدائی تعلیم اپنے آبائی شہر میں حاصل کی اور پھر لاہور کا رخ کیا ۔ 1899 میں ایم اے کرنے کے بعد اورینٹل کالج میں شعبہ درس و تدریس سے وابستہ ہوگئے اور اس دوران شاعری بھی جاری رکھی۔

 علامہ اقبال  1905 میں برطانیہ چلے گئے جہاں پہلے انھوں نے کیمبرج یونیورسٹی ٹرنٹی کالج میں داخلہ لیا اور پھر معروف تعلیمی ادارے لنکنزاِن میں وکالت کی تعلیم لینا شروع کردی بعد ازاں بعد وہ جرمنی چلے گئے جہاں میونخ یونیورسٹی سے انھوں نے فلسفہ میں پی ایچ ڈی کی ڈگری حاصل کی۔

انہوں نے اپنی ہمہ گیر شاعری کے ذریعے برصغیر کے مسلمانوں کو بیدار کیا اور 1930  میں آلہ باد میں اپنے تاریخی خطبے میں قیام پاکستان کا تصور پیش کیا ۔

علامہ اقبال کے اس خطاب نے برصغیر کے مسلمانوں کو پاکستان کے حصول کیلئے واضح سمت اور جداگانہ تشخص دیا۔ شاعرِ مشرق ڈاکٹر  علامہ محمد اقبال بیسویں صدی کے معروف مفکر، شاعر، مصنف، قانون دان، سیاست دان، مسلم صوفی اور تحریک پاکستان کی اہم ترین شخصیات میں سے ایک تھے۔

اس حوالے سے دن کا آغاز مساجد میں پاکستان کی ترقی و خوشحالی کیلئے خصوصی دعائوں کے ساتھ ہوا ۔لاہور میں علامہ اقبال کے مزار پر گارڈز کی تبدیلی کی پروقار تقریب ہوئی ۔ پاک بحریہ کے  چاق و چوبند دستے  نے اعزازی گارڈ کی ذمہ داریاں سنبھال لیں  جبکہ  پاکستان رینجرز پنجاب کا دستہ اپنے فرائض سے سبکدوش ہوگیا۔ 

پاک بحریہ کے اسٹیشن کمانڈر لاہور کموڈور ساجد حسین، چیف آف دی نیول اسٹاف ایڈمرل محمد امجد خان نیازی تقریب میں بطور مہمان خصوصی شریک ہوئے ۔پاک بحریہ کے افسران ،جوانوں اور نیوی سویلینز کی جانب سے مزار پر پھولوں کی چادر چڑھائی گئی ۔ یوم پیدائش کی مناسبت سے مزار اقبال پر فاتحہ خوانی بھی کی گئی ۔