عمران خان کےدونوں بیٹے پاکستان پہنچ گئے 

جی این این کے مطابق  قاسم اور سلمان زمان پارک لاہور میں واقع اپنے والد کی رہائش گاہ  پہنچے جہاں انہوں نے اپنے والد عمران خان سے ملاقات کی اور ان کی خیریت دریافت کی ۔

عمران خان بڑے حوصلے اور مسکراہٹ کے ساتھ بیٹوں سے ملے۔  قاسم اور سلمان نے اس موقع پر اپنے والد سے کہا کہ آپ پر حملے کی خبر نے ہمیں پریشان کر دیا تھا۔

عمران خان کا اسکواڈ دونوں بیٹوں  کو لینے ائیرپورٹ گیا تھا جہاں  میاں اسلم اقبال اور عمرسرفراز چیمہ نے ائیرپورٹ پر استقبال کیا۔ 

واضح رہے کہ گزشتہ ہفتے چیئرمین پاکستان تحریکِ انصاف عمران خان نے قاتلانہ حملے کے بعد برطانیہ میں اپنے بچوں سے ٹیلی فون پر رابطہ کیا تھا ،  عمران خان کے بیٹوں نے ان کی خیریت دریافت کی تھی۔ 

اس سے قبل عمران خان کی سابقہ اہلیہ جمائما گولڈ اسمتھ نے ٹوئٹر پر ایک بیان میں کہا تھا کہ خوفزدہ کر دینے والی خبر آئی تاہم خدا کا شکر کہ عمران خان ٹھیک ہیں۔

جمائما نے عمران خان کے بیٹوں کی طرف سے حملہ آور کو پکڑنے والے بہادر شخص ابتسام کا شکریہ بھی ادا کیا تھا۔