اسٹیج اور ٹی وی کے معروف فنکار اسماعیل تارا انتقال کرگئے

تفصیلات کے مطابق ان کی نماز جنازہ آج بعد نماز جمعہ  شہید ملت روڈ  پر واقع میمن  پہاڑی مسجد  میں دا کی جائے گی ۔

نامور کامیڈین کے سوگواران  میں بیوہ، 4 بیٹے اور ایک بیٹی شامل ہے ۔ 

اہلِ خانہ کے مطابق لیجنڈری اداکار تین روز سے کراچی کے ایک نجی اسپتال میں زیر علاج تھے ۔  ان کے گردے فیل ہوگئے تھے، انہیں  کل صبح ہی وینٹیلیٹر پر منتقل کیا گیا تھا۔

نومبر 1949 میں کراچی میں پید ا ہونے والے نامور فنکار اسمٰعیل تارا کااسٹیج، ٹیلی ویژن اور سنیما میں شاندار کیریئر رہا۔

انہوں نے اسٹیج ڈراموں میں اپنے کام کا آغاز 1964 میں کرنا شروع کیا جب کہ وہ نوعمر تھے، ان کے ساتھ مختلف مواقع پر کام کرنے والے ساتھی فنکاروں کے مطابق ان کی نقالی کرنے کی مہارت نے فوری طور پر انہیں نمایاں کردیا اور ان کی ایک شناخت بن گئی جس کی وجہ سے کچھ عرصے بعد ہی انہیں پاکستان ٹیلی ویژن پر کام کرنے کا موقع مل گیا۔

وہ 1979 سے 1981 تک جاری رہنے والے کامیڈی شو ففٹی ففٹی کے ذریعے شہرت کی بلندیوں پر پہنچے، امریکی کامیڈی شو  سے متاثر یہ پروگرام سپر ہٹ ہوا اور آج تک اسے پی ٹی وی کی تاریخ کے بہترین کامیڈی شوز میں سے ایک قرار دیا جاتا ہے۔

 اسماعیل تارا کو بہترین اداکاری پر 5 بار نگار ایوارڈز تفویض کیے گئے تھے۔

انہوں  نے ٹی وی اور اسٹیج کے علاوہ 14 پاکستانی فلموں میں بھی کام کیا۔ 

ان کی نامور فلموں میں ہاتھی میرا ساتھی، آخری مجرا، منڈا بگڑا جائے شامل ہیں جس میں کام پر انہیں نگار ایوارڈ ملا۔ فلم چیف صاحب اور فلم دیواریں میں کام پر بھی اسماعیل تارا کو نگار ایوارڈ دیا گیا۔

مزاحیہ خاکوں پر مشتمل ڈرامے ففٹی ففٹی میں ماجد جہانگیر کے ساتھ منوا اور ببوا کا کردار کیا۔

وفاقی وزیر اطلاعات و نشریات مریم اورنگزیب سمیت ملک کی سیاسی سماجی شخصیات نے اسٹیج اور ٹی وی کے معروف اداکار اسماعیل تارا کے انتقال پر اظہار افسوس کیا ہے۔