فوج پروپیگنڈے اور جھوٹے بیانیے کے باوجود غیرسیاسی رہے گی : آرمی چیف 

خلیجی اخبار کو انٹرویو دیتے ہوئے آرمی چیف جنرل قمر جاوید باجوہ  نے کہا کہ فوج کے غیر سیاسی ہونے کو کچھ افراد نے ہدفِ تنقید بنایا ہے۔

پاک فوج کے سپہ سالار نے کہا  کہ افواجِ پاکستان نے اندرونی خلفشار پر قابو پانے میں ہمیشہ کردار ادا کیا۔

ان کا کہنا تھا  کہا کہ افواجِ پاکستان نے بذریعہ عسکری سفارت کاری عالمی سیاست میں توازن قائم رکھا، فوج کے غیر سیاسی ہونے سے جمہوری اقدار پروان چڑھے گی۔

انہوں نے مزید کہا ہے کہ فوج کے غیر سیاسی ہونے سے پاکستان میں سیاسی استحکام کو فروغ ملے گا۔

آرمی چیف جنرل قمرجاوید باجوہ کا یہ بھی کہنا ہے کہ فوج کے غیر سیاسی ہونے سے فوج کے عوام سے تعلقات مضبوط ہوں گے۔

ان کا کہنا ہے کہ پاکستان خلیجی عرب ممالک اور مشرق وسطیٰ کے دیگر ممالک کے ساتھ برادرانہ تعلقات رکھتا ہے ۔ جس کی جڑیں ہماری مضبوط مذہبی، تاریخی اور ثقافتی وابستگی میں پیوست ہیں ، برادر عرب ریاستوں کے ساتھ ہمارے بے لوث تعلقات ہیں۔

پاک فوج کے سپہ سالار نے کہا کہ پاکستان نے ہمیشہ اپنے مسلم پڑوسی ممالک کے ساتھ پرامن اور دوستانہ تعلقات کی خواہش کی ہے ۔ اندرونی محاذ پر، پاکستان کی کامیاب انسداد دہشت گردی مہم نے دہشت گردی کا رخ موڑ دیا ہے ۔ ہم انتہا پسندی اور دہشت گردی پر قابو پانے کے لیے بامعنی کوششیں جاری رکھے ہوئے ہیں۔