بھارت پاکستان میں دہشتگردی میں ملوث ہے,معاملہ اقوام متحدہ کے سامنے رکھنے کا فیصلہ: حناء ربانی کھر

تفصیلات کے مطابق وزیر مملکت برائے خارجہ حناء ربانی کھر نے پریس بریفنگ دیتے ہوئے کہا کہ پاکستان نے دہشتگردی کیخلاف جنگ میں بہت قربانیاں دی ہیں، واضح ثبوت موجود ہیں کہ بھارت پاکستان میں دہشتگردی میں ملوث ہے، بھارت کے دہشت گردی میں ملوث ہونے کے ثبوت دنیا کو دکھائیں گے۔

حنا ربانی کھر کا کہنا تھا کہ بھارت کے خلاف ڈوزیئر میں شواہد موجود ہیں، جوہر ٹاؤن دھماکےمیں بھارت ملوث ہے، پاکستانی حکومت اس معاملےکوعالمی سطح پراٹھائے گی۔

وزیر مملکت برائے خارجہ نے کہا کہ پاکستان دہشت گردی سے سب سے زیادہ متاثر ہواہے، سانحہ سمجھوتہ ایکسپریس اور کلبھوشن یادیو کی گرفتاری واضح ثبوت ہیں، کسی ملک کو دوسرے ملک پر دہشت گردی کا الزام لگانے سے فائدہ نہیں ہوتا لیکن بھارت دہشتگردی کرکے دوسرے ملک پر الزام تراشی کرتاہے اور دنیا کی توجہ ہٹانےکی کوشش کرتا ہے۔

ان کا کہنا تھا کہ بھارت یواین قراردوں کو ہمیشہ جھٹلاتارہاہے، بھارت مسلسل اقوام متحدہ کی قراردادوں کی خلاف ورزی کرتارہاہے اور عالمی قوانین کی خلاف ورزی کامرتکب ہورہاہے اور پڑوسی ممالک میں عدم استحکام پھیلانے میں ملوث رہاہے۔

حنا ربانی کھر نے واضح کیا کہ بھارت کو آگاہ کرتی ہوں کسی کو دہشتگردی کا نشانہ بناتے ہیں تو پورا خطہ متاثرہوتاہے، عالمی برادری کی بھارت کی دہشت گردی پر آنکھیں بند ہیں ، عالمی اداروں کی ذمہ داری ہے کہ بھارت کااحتساب کریں۔

وزیر مملکت برائے خارجہ نے روز دیا کہ عالمی اداروں کو دہشتگردی کی معاونت ،سہولت کاری روکنے کےاقدامات کرنا ہوں گے ، ہم یہ ڈوزیئر اقوام متحدہ کےسیکریٹری جنرل سمیت دیگر عالمی فورمز پر شیئرکریں گے۔

انھوں نے بتایا کہ پاکستان نے بھارت کی پاکستان میں ریاستی دہشت گردی کا معاملہ اقوام متحدہ میں اٹھانے کا فیصلہ کیا ہے اور بھارتی دہشتگردی پر ڈوزئیر یواین سیکریٹری جنرل سے بھی شیئرکر رہے ہیں۔

حنا ربانی کھر نے مزید کہا کہ بلوچستان سمیت پاکستان کے دیگر علاقوں میں دہشتگردی میں بھارت ملوث رہاہے، گوادرمیں ہوٹل، کراچی میں چینی قونصلیٹ پرحملے میں بھارت ملوث ہے، کیسے کسی ملک کی سرزمین دوسرے ملک میں دہشتگردی کیلئے استعمال ہورہی ہے۔

ان کا کہنا تھا کہ لاہور واقعے کے ذمہ داران بھارت کی پناہ میں ہیں، بھارت کی مقبوضہ کشمیر میں انسانی حقوق کی خلاف ورزیاں سامنے ہیں، سمجھوتہ ایکسپریس سانحہ بھارت کی ہٹ دھرمی کی مثال ہے، کلبھوشن اور اس طرح کی کئی مثالیں بھارت کی دہشت گردی کا ثبوت ہیں، شواہد واضح کرتے ہیں کہ ایک بڑا گروپ خطےمیں دہشت گردی میں ملوث ہے۔