تونیشا شرما کو خود کشی پر اکسانے والا معروف انڈین اداکار گرفتار

عالمی میڈیا کے مطابق حکام نے بتایا کہ پولیس کا کہنا ہے کہ انہیں یہ اطلاع ملی کہ چائے کے وقفے کے بعد اداکارہ بیت الخلا گئیں اور جب وہ واپس نہیں آئیں تو پولیس نے دروازہ توڑا اور دیکھا کہ اداکارہ نے اپنے آپ کو پھندے سے لٹکایا ہوا ہے۔

اسی سلسلے میں پولیس نے بڑی پیش رفت کرتے ہوئے تونیشا شرما کے ساتھ کام کرنے والے اداکار شیزان خان کو تونیشا کو خودکشی پر اکسانے کے الزام میں گرفتار کرلیا ہے۔ پولیس نے اتوار کے روز بتایا کہ ملزم کو انڈین پینل کوڈ کی دفعہ 306 کے تحت گرفتار کیا گیا ہے جبکہ انہیں پیر کے روز عدالت میں پیش کیا جائے گا۔

پولیس نے مزید کہا کہ وہ اداکارہ کی موت کے بارے میں قتل اور خودکشی دونوں زاویوں سے تفتیش کریں گے جبکہ ٹی وی سیٹ پر موجود افراد کا کہنا ہے کہ تونیشا کی موت خودکشی کے باعث ہوئی ہے۔

خیال رہے کہ تونیشا شرما نے گزشتہ روز شوٹنگ کے دوران پھندا لگاکرخودکشی کرلی تھی۔ بھارتی میڈیا کے مطابق 20 سالہ تونیشا شرما ہفتے (24 دسمبر) کی دوپہر ایک میوزک ویڈیو کی شوٹنگ کرنے والی تھی، اس نے شوٹنگ کے سیٹ پر پھانسی لگا کر مبینہ طور پر خودکشی کر لی۔

سیٹ پر موجود لوگوں نے اسے لٹکتے ہوئے دیکھا اور اسے نیچے اتار کر اسپتال لے گئے، جہاں ڈاکٹروں نے اس کی موت کی تصدیق کردی۔

20 سالہ تونیشا شرما کئی ڈراموں اور فلموں میں کام کرچکی ہیں، ان کے قابل ذکر ڈراموں میں عشق سبحان اللہ، انٹر نیٹ والا لو اور گبر پونچھ والا شامل ہیں۔ تونیشا شرما نے کترینہ کیف کی فلم فتور میں بھی اداکاری کے جوہر دکھائے تھے۔