ممتاز شاعرہ پروین شاکر کو گزرے 28  برس بیت گئے

پروین شاکر24 نومبر1952 کو کراچی کے ایک ادبی گھرانے میں پیدا ہوئیں ، پروین شاکر کے والد کا نام سید شاکر حسن تھا، آپ کے نانا حسن عسکری نے انہیں ادبی دنیا میں روشناس کرانے میں اہم کردار ادا کیا۔

پروین شاکر دورانِ تعلیم اردو مباحثوں میں حصہ لیتیں رہیں اور اس کے ساتھ ساتھ وہ ریڈیو پاکستان کے مختلف علمی ادبی پروگراموں میں شرکت کرتی رہیں۔انہوں نے انگریزی ادب،لسانیات اور بنک مینجمنٹ  میں تین ایم اے کیے اور بینک ایڈمسٹریشن میں پی ایچ ڈی کی ڈگر ی حاصل کی ۔پروین شاکر درس و تدریس کے شعبہ سے وابستہ رہیں اور پھر بعدمیں انہوں  نے سرکاری ملازمت اختیار کر لی ۔

1976 میں پروین شاکر نے  سول سروس آف پاکستان (سی ایس پی) میں شمولیت اختیار کی اور انہیں کسٹمز کیڈر مختص کیا گیا۔ وہ 1986 میں  سیکرٹری کے عہدے پر فائز  ہوئیں۔

1976 میں ان کی شاعری کے پہلے مجموعے کی اشاعت ہوئی اور اس   مجموعے کوبے پناہ  شہرت حاصل  ہوئی  ۔پروین شاکر نے اپنی نظموں میں  مشرقی انداز اپنا یا ،انہوں نے اپنی شاعری میں   نہ  صرف خود بلکہ مختلف شعبوں میں کام کرنے والی خواتین  کے تجربات اورجذبات کا بھی اظہار کیا ۔ شاعری میں  پروین شاکر کو احمد ندیم قاسمی صاحب کی سرپرستی بھی حاصل رہی۔

پروین شاکر کی معروف کتابوں میں خوشبو، صد برگ، خود کلامی، انکار اور ماہ تمام شامل ہیں۔پروین شاکر نے بہت ہی کم عرصے میں نہ صرف پاکستان بلکہ دنیا  بھرمیں  اردو ادب سے لگاؤ رکھنے والوں کے دلوں میں گھرکرلیا۔ پروین شاکر کو دور جدید کے شعراءمیں نمایاں مقام حاصل ہے ۔

اردو ادب  میں شاندار خدمات کے اعتراف میں پروین شاکر کو 1990میں صدارتی تمغہ حسن کارکردگی سے نوازا گیا۔پروین شاکر  26دسمبر 1994کو 42 برس کی عمر میں اسلام آباد میں ایک کار حادثے میں  وفات پاگئیں ۔ان کی شاعری  کو  آج بھی ادب کا ذوق رکھنے والے افراد   بے پناہ پسند کرتے ہیں۔