میٹرک اور انٹرمیڈیٹ سالانہ امتحانات کا ترمیم شدہ شیڈول جاری

تفصیلات کے مطابق   پنجاب بھر میں میٹرک اور انٹرمیڈیٹ امتحانات کا ترمیم شدہ شیڈول جاری کر دیا گیا ہے ۔ پنجاب بورڈ کمیٹی آف چیرمینز کا اجلاس 9 اپریل کو منعقد ہوا۔ اجلاس میں صوبہ بھر کے تعلیمی بورڈز سے مشاورت کے بعد میٹرک اور انٹر امتحانات کا نیا شیڈول جاری کیا گیا ۔

جی این این کے مطابق  میٹرک امتحان  مورخہ  25 مئی جبکہ  انٹرمیڈیٹ سالانہ امتحان مورخہ  3 جولائی سے شروع ھو گا ۔میٹرک کے نتائج 21 ستمبر اور انٹر کا نتیجہ 20 اکتوبر کو جاری ہوگا۔دونوں جماعتوں کے امتحانات اٹھائیس ،اٹھائیس روز میں مکمل کئے جائیں گے۔ 

چند دن قبل   تعلیمی اداروں کو کھلا رکھنے یا بندش سے متعلق فیصلے کے لیے این سی او سی کا خصوصی اجلاس  ہوا تھا ، نیشنل کمانڈ اینڈ آپریشن سینٹر کے اس اہم اجلاس میں وفاقی وزیر تعلیم شفقت محمود، چاروں صوبوں کے صوبائی وزرائے صحت اور تعلیم بھی شریک ہوئے  تھے ۔وفاقی وزیر تعلیم شفقت محمود نے میڈیا بریفنگ میں بتایا  تھاکہ   ملک بھر میں اے اور او لیول کے امتحانا ت کی تاریخ میں کوئی تبدیلی نہیں ہوگی،  اے اور او لیول امتحانات شیڈول کے مطابق  ہوں گے ،  نویں اور دسویں کے امتحانات مئی کے تیسرے ہفتے میں لیے جائیں گے ،  جامعات سے درخواست کی تھی کہ داخلے کا شیڈول آگے کردیں، امتحانات تاخیر سے ہوں گے تو رزلٹ تاخیر سے آئے گا اس لیے جامعات داخلے آگے کردیں۔ ان کاکہنا تھا کہ   نویں دسویں کی کلاس ہفتے میں ایک روزرکھنے  جبکہ گیارہویں اوربارہویں جماعت کی کلاس بھی ہفتے میں ایک روز کرنے کا فیصلہ کیا گیا ہے ۔

وفاقی وزیر تعلیم نے کہا کہ  جو اضلاع  کورونا سے زیادہ  متاثر ہیں وہاں پہلی سے آٹھویں تک کلاسز 28 اپریل تک بند کر دی گئی ہیں، پنجاب کے 13 اضلاع  ایسے ہیں جو کورونا سے متاثر ہیں اس لیے وہاں پہلی سے آٹھویں تک کی کلاسز 28 اپریل تک نہیں ہونگی۔ 28 اپریل کو دوبارہ اس معاملے کا جائزہ لیں گے کہ اسکولوں کو عید تک بند رکھا جائے یا عید سے پہلے اسکولز کھولے جائیں۔وفاقی وزیر نے کہا کہ بھارت، سری لنکا، نیپال میں بھی اے ،او لیول کے امتحانات ہو رہے ہیں، دنیا کے 80 فیصد ممالک میں امتحانات ہورہے ہیں۔