رضاکارانہ طور پر جیل بھرو تحریک کے لیے رجسٹریشن کرائیں، پھر تاریخ دوں گا: عمران خان

سابق وزیراعظم عمران خان نے جاری کردہ اپنے ویڈیو پیغام میں کہا ہے کہ قومیں قانون کے تحت چلتی ہیں، آئین فیصلہ کرتا ہے کیا جائز ہے کیا ناجائز؟ لیکن جب سے امپورٹڈ حکومت آئی ہے، آئین کی دھجیاں اڑائی گئی ہیں۔

انہوں نے کہا کہ عدالت نے اسلام آباد بلدیاتی الیکشن 48 گھنٹے میں کرانے کا حکم دیا، مہینہ ہوگیا لیکن اسلام آباد میں بلدیاتی انتخابات نہیں ہو رہے ہیں، آئین بنیادی حقوق کی حفاظت کرتا ہے مگر ہمارے لوگوں کو اٹھایا گیا، ایک ٹویٹ پر لوگوں کو اٹھا کر تشدد کیا گیا، کئی لوگوں کا تشدد کے بعد ذہنی توازن ٹھیک نہیں ہوا۔

عمران خان نے کہا کہ عدالت شیخ رشید کو ضمانت دیتی ہے توسندھ و بلوچستان میں کیسز بنائے جاتے ہیں، عدالت کہتی ہے فواد چودھری کو عدالت میں پیش کریں لیکن وہ اسلام آباد لے جاتے ہیں۔

چیئرمین پی ٹی آئی نے ویڈیو پیغام میں کہا کہ 25 مئی کو پرامن احتجاج کرنے والوں پر تشدد کیا گیا، قوم کا آئین اور قانون پر سے اعتماد اٹھتا جا رہا ہے، آئین میں واضح ہے کہ 90 دن میں الیکشن ہوں گے، پنجاب اور خیبرپختونخوا میں حکومتیں آئین کے تحت تحلیل کیں، ملک بحران اور سیاسی عدم استحکام کا شکار ہے۔

انہوں نے کہا کہ ہم نے 2 حکومتوں کی قربانی دیں، 20 سے 25 دن ہوگئے لیکن الیکشن کمیشن اور گورنرز نے الیکشن کی تاریخ نہیں دی، اگر 90 دن سے آگے گئے تو آئین میں واضح ہے کہ آرٹیکل 6 لگے گا، پوری قوم عدالتوں کی طرف دیکھ رہی ہے، نظریہ ضرورت سے ملک کے نیچے جانے کا سفر شروع ہوا، اب بھی وہی وقت ہے۔

عمران خان نے کہا کہ اگر 90 دن سے الیکشن آگے گئے تو انصاف کیلئے جیل بھرو تحریک کا فیصلہ کیا، جن پر کرپشن کے مقدمات تھے، انہیں جیل میں شاہانہ انداز میں رکھا گیا، مریم کو پانامہ انکشاف کے بعد جیل میں رکھا گیا، کوئی تشدد نہیں ہوا۔

انہوں نے کہا کہ ایک راستہ یہ ہے کہ ہڑتال کریں، پہیہ جام کریں، پتھراؤ کریں لیکن ملک میں معاشی بحران ہے، اس لئے ہڑتال نہیں کر رہے ہیں، پرامن جدوجہد کے طور پر جیل بھرو تحریک کا فیصلہ کیا ہے۔

چیئرمین پی ٹی آئی عمران خان نے اپنے ویڈیو پیغام میں کہا کہ جیل بھرو تحریک سے حقیقی آزادی اور حقیقی جمہوریت حاصل کریں گے۔