وفاقی کابینہ میں ایک بار پھر توسیع،5 نئے معاونین خصوصی تعینات

 وفاقی کابینہ میں ایک بار پھر توسیع کر دی گئی،کابینہ کی تعداد بڑھ کر 83 تک پہنچ گئی۔

تفصیلات کے مطابق وزیر اعظم شہباز شریف نے 5 نئے معاونین خصوصی تعینات کر دئیے ہیں،نئے تعینات ہونے والے معاونین خصوصی میں رکن قومی اسمبلی راؤ اجمل،شائستہ پرویز اور قیصر احمد شیخ شامل ہیں۔

اس کے علاوہ محمد حامد حمید اور ملک سہیل خان کو معاونین خصوصی تعینات کیا گیا ہے،کابینہ ڈویژن نے تعیناتیوں کا نوٹیفکیشن جاری کر دیا۔ 

یاد رہے کہ گزشتہ دنوں بھی وزیر اعظم نے کابینہ میں مزید توسیع کی۔سابق گورنر اسٹیٹ بینک طارق باجوہ کو معاون خصوصی خزانہ تعینات کیا گیا جن کا نوٹیفیکشن بھی جاری کیا گیا،

طارق باجوہ کا عہدہ وزیر مملکت کے برابر ہے۔  طارق باجوہ کی تعیناتی کے بعد وزیر اعظم شہباز شریف کے کابینہ کی تعداد 75 ہوگئی تھی۔وزیر اعظم کے معاونین خصوصی کی تعداد 29 پر پہنچ گئی۔

وزیر اعظم کے 23 معاونین خصوصی کے پاس کوئی قلمدان نہیں۔جاوید لطیف بھی کئی مہینوں سے بغیر کسی قلمدان کے وفاقی وزیر ہیں۔اس سے قبل وزیراعظم شہبازشریف نے سینئرقانون دان عرفان قادر کو معاون خصوصی مقرر کیا تھا۔

کابینہ ڈویژن کی جانب سے جاری نوٹیفکیشن کے مطابق عرفان قادر کا عہدہ وفاقی وزیر کے برابر ہے۔ 13 ستمبر کو بھی وزیر اعظم شہباز شریف کے 8 نئے معاونین خصوصی کی تقرری کی گئی تھی۔ 

نوٹیفکیشن کے مطابق نوابزادہ افتخار احمد خان،مہر ارشاد احمد خان،رضا ربانی کھر،مہیش کمار،فیصل کریم کنڈی اور سردارسلیم حیدر وزیر اعظم کے معاون خصوصی مقرر ہوئے۔

تسنیم قریشی اور محمد علی شاہ کو بھی وزیر اعظم کا معاون خصوصی مقرر کیا گیا۔ جبکہ سابق اسپیکر قومی اسمبلی اسد قیصر نے حکمران اتحاد پر کڑی تنقید کرتے کہا کہ موجودہ کابینہ میں 34 وزراء،6 ایڈوائزر اور 28 سے 29 معاون خصوصی ہیں۔

جن میں اکثریت کے پاس کوئی وزارت نہیں،معیشت تنزلی کی طرف جا رہی ہے،پیٹرول کی قیمتیں اور مہنگائی عروج پر ہے اور ان کو اپنی عیاشیوں سے فرصت نہیں ملتی۔