رمضان المبارک ، مرکزی رویت ہلال کمیٹی کا اجلاس آج ہوگا

تفصیلات کے مطابق رمضان المبارک کا چاند دیکھنے کیلئے مرکزی رویت ہلال کمیٹی کے اجلاس کی صدارت چیئرمین مولانا عبدالخبیر آزاد کرینگے۔ مرکزی رویت ہلال کمیٹی کا اجلاس ایڈمنسٹریٹراوقاف کے دفتر عید گاہ میں منعقد ہوگا۔  جبکہ زونل رویت ہلال کمیٹیوں کے اجلاس اسلام آباد، لاہور، کوئٹہ اور کراچی میں ہونگے۔وزارت سائنس وٹیکنالوجی اور رویت ہلال ریسرچ کونسل کی پیشن گوئیوں کے مطابق آج چاند دیکھا جاسکے گا۔

محکمہ موسمیات و فلکیات کے مطابق آج پاکستان میں چاند دکھائی دینے کا امکان ہے اور یکم رمضان کل 14 اپریل بروز بدھ کو متوقع ہے تاہم حتمی اعلان مرکزی رویت ہلال کمیٹی کرے گی۔محکمہ موسمیات نے کہا ہے کہ رمضان المبارک کا چاند پیر کی صبح 7 بجکر 32 منٹ پر پیدا ہوچکا ہے، آج غروب آفتاب کے وقت چاند کی عمر 35 گھنٹے سے زائد ہوگی، آج شام چاند نظر آنے کے واضح امکانات ہیں۔ محکمہ موسمیات نے مزید کہا ہے کہ رمضان المبارک کے دوران موسم گرم اور خشک رہے گا،جبکہ  15 روزوں کے بعد درجہ حرارت میں اضافہ ہو گا۔

دوسری جانب سعودی عرب میں پیر کے روز رمضان المبارک کا چاند نظر آگیا ہے ،  عرب میڈیا کے مطابق سعودی عرب اور دیگر خلیجی ممالک میں آج پہلا روزہ ہے۔