امریکا کی افغانستا ن کے فوجی انخلاء کی تاریخ میں توسیع کے معاملے پر طالبان کا رد عمل

غیر ملکی خبر رساں ادارے کے مطابق امریکہ کی جانب سے افغانستان کے فوجی انخلاء کی تاریخ میں توسیع کے معاملے پر  طالبان کا ردِ عمل سامنے آگیا۔ ترجمان طالبان کا کہنا ہے کہ  تمام غیرملکی فوجیں دوحہ معاہدے میں مقرر کردہ تاریخ تک افغانستان سے   نکل جائیں، دوحہ معاہدے کی خلاف ورزی اور مقرر کردہ تاریخ کے بعد افغانستان میں غیرملکی افواج کا قیام مسائل کا سبب بنےگا۔ا

ترجمان طالبان کا کہنا ہے کہ  ان مسائل کا ذمہ دار دوحہ معاہدے کی خلاف ورزی کرنیوالے ہوں گے۔

واضح رہے کہ امریکا کی جانب سے 11ستمبر تک افغانستان سے تمام فوجی اہلکار نکالنے کا اعلان کیاگیاہے۔نیٹو نے بھی امریکہ کیساتھ ہی افغانستان سے اپنی فوج نکالنے کا اعلان کیاہے۔

یاد رہے کہ 29 فروری 2020 کو قطر کے دارالحکومت دوحہ میں امریکہ اور افغان طالبان کے مابین تاریخی معاہدہ طے پایا تھا۔جس کے بعد یہ امید کی جارہی تھی کہ اس سے گذشتہ کئی برسوں سے شورش کے شکار ملک افغانستان میں امن کی راہیں کھلیں گی۔

 اس معاہدے میں یہ طے پایا تھا کہ نہ صرف امریکہ مئی 2021 تک اپنی فوجوں کا انخلا کرے گا بلکہ امریکہ اور طالبان، افغان فریقین کے مابین مذاکرات سے پہلے ہزاروں قیدیوں کا تبادلہ کریں گے۔

دوسری جانب طالبان بھی وعدہ کر چکے ہیں کہ وہ شدت پسندوں کو افغانستان میں سرگرم نہیں ہونے دیں گے۔