پاک فوج الیکشن ڈیوٹی کیلئے دستیاب نہیں، وزارت دفاع نے الیکشن کمیشن کو آگاہ کردیا

وزارت دفاع نے الیکشن کمیشن کو آگاہ کیا ہے کہ پاک فوج الیکشن ڈیوٹی کیلئے دستیاب نہیں۔

سیکریٹری دفاع اور ایڈیشنل سیکریٹری دفاع نے الیکشن کمیشن کے اجلاس میں بتایا کہ سرحدوں اور ملک کی حفاظت اولین ترجیح ہے۔ موجودہ ملکی حالات کی وجہ سے پاک فوج الیکشن ڈیوٹی کے لئے اس وقت دستیاب نہیں۔

انہوں نے کہا کہ معاشی صورتحال کا اثر فوج پر بھی ہے۔ حکومت وقت کا فیصلہ ہوگا کہ وہ فوج کو بنیادی فرائض منصبی کی انجام دہی تک محدود رکھتی ہے یا ثانوی فرائض یعنی الیکشن ڈیوٹی پر تعینات کرتی ہے۔

ان کا کہنا تھا کہ الیکشن ڈیوٹی کی صورت میں فوج کوئیک رسپانس فورس کی صورت میں دسیتاب کی جا سکتی ہے۔ اسٹیٹک موڈ میں ڈیوٹی سرانجام دینا ممکن نہیں۔