مکافات عمل کیا ہوتا ہے قوم کو نظر آ رہاہے، مریم اورنگ زیب

اسلام آباد: وفاقی وزیر اطلاعات و نشریات مریم اورنگزیب نے کہا ہے کہ مکافات عمل کیا ہوتا ہے آج قوم کو نظر آ رہا ہے، دوسروں کی بیماری کا مذاق اڑانے والا آج وہیل چیئر پر بیٹھ کر عدالت نہ جانے کا بہانہ بنا رہا ہے۔

کلثوم نواز کی بیماری اور پھر موت، نواز شریف کی بیماری اور شہباز شریف کی کمر درد کا مذاق اڑانے والا آج وہیل چئیر پر بیٹھ کر جھوٹ بول رہا ہے۔

جمعرات کو اپنے بیان میں وفاقی وزیر اطلاعات مریم اورنگزیب نے عمران خان کو چیلنج کیا کہ انہیں جس جس سے خطرہ ہے عدالت جا کر ثبوت دیں ورنہ اپنا منہ بند رکھیں۔

مریم اورنگزیب کہا کہ فارن ایجنٹ بہروپیا ہے جو حالات کے مطابق سکرپٹ اور حلیہ بنا لیتا ہے، گرفتاری کے ڈر سے وہ چارپائی کے نیچے اور ضمانت خارج ہونے کے ڈر سے وہیل چیئر کا ڈرامہ رچاتا ہے۔ انہوں نے کہا کہ فارن ایجنٹ کے پائوں پر دبائو نہیں، ان کے دماغ پر سازشی دبائوہے۔