موجودہ عالمی معاشی دباوٴ کے پیش نظر سادگی اور بچت پر مبنی جامع لائحہ عمل تشکیل دیا جائے،وزیر اعظم

اسلام آباد:وزیر اعظم محمد شہباز شریف نے ہدایت کی کہ موجودہ عالمی معاشی دباوٴ کے پیش نظر سادگی اور بچت پر مبنی جامع لائحہ عمل تشکیل دیا جائے۔

تفصیلات کے مطابق وزیر اعظم محمد شہباز شریف نے کی زیر صدارت حالیہ عالمی تناظر میں ملکی معاشی صورتحال کا جائزہ لینے کے لیے اہم اجلاس منعقد ہوا جس میں عالمی سطح پر بڑھتی ہوئی کشیدگی اور اس کے خطے پر ممکنہ معاشی اثرات کے حوالے سے تفصیلی بریفنگ دی گئی۔

دوران اجلاس انہوں نے کمیٹی کو ہدایت کی کہ آئندہ 48 گھنٹوں میں قابلِ عمل تجاویز پیش کی جائیں، جن میں اس بات کو یقینی بنایا جائے کہ عوام پر بوجھ کم سے کم پڑے اور عوامی ریلیف کو اولین ترجیح دی جائے۔

اجلاس کے دوران وزیر اعظم کو بتایا گیا کہ حالیہ کشیدگی کے باعث بین الاقوامی سطح پر معاشی دباوٴ میں اضافہ ہوا ہے، جس کے اثرات مختلف ممالک کی معیشتوں پر پڑ رہے ہیں۔ اس موقع پر وزیر اعظم کو اس حوالے سے قائم فعال کمیٹی کی جانب سے جاری کام پر بھی بریفنگ دی گئی۔

اجلاس میں بتایا گیا کہ وزیر اعظم نے گزشتہ ہفتے سے ہی حالیہ کشیدگی کے عالمی سطح پر معاشی اثرات کا جائزہ لینے کے لئے کمیٹی تشکیل دے دی تھی جو اس حوالے سے لائحہ عمل پر کام کر رہی تھی، جس کی وجہ سے ملک میں پیٹرولیم مصنوعات کی کمی پیدا نہیں ہوئی۔

گزشتہ روز پیٹرولیم مصنوعات کی قیمت میں اضافہ کمیٹی کی تجویز پر ہوا، جس میں عالمی سطح پر اضافے کا کم سے کم بوجھ صارفین پر منتقل کیا گیا،وزیر اعظم نے کمیٹی کو مزید فعال انداز میں کام کرنے اور جلد از جلد عوام کے لیے سہل اور قابلِ عمل سفارشات پیش کرنے کی ہدایت کی۔

انہوں نے واضح ہدایت جاری کی کہ جو بھی پٹرول پمپ یا کمپنی مصنوعی قلت پیدا کرنے یا ذخیرہ اندوزی میں ملوث پائی گئی، اسے فوری طور پر بند کر کے اس کا لائسنس منسوخ کیا جائے اور ذمہ داروں کے خلاف قانونی کارروائی کی جائے۔

دوران اجلاس وزیر اعظم نے وزیر خزانہ اور وزیر پیٹرولیم کو ہدایت کی کہ وہ چاروں صوبوں کا دورہ کریں اور صوبائی حکومتوں کے ساتھ مل کر پیٹرولیم مصنوعات کی بچت اور عوام کو ان کی بلا تعطل فراہمی کے لیے جامع لائحہ عمل اور منصوبہ بندی تیار کریں۔