شنگھائی تعاون تنظیم کے بیشتر ارکان سی پیک کا حصہ بننے کے خواہشمند ہیں،وزیر خارجہ بلاول بھٹو زرداری

کراچی ۔6مئی (اے پی پی):وزیر خارجہ بلاول بھٹو زرداری نے کہا ہے کہ شنگھائی تعاون تنظیم (ایس سی او) کے بیشتر ارکان چین پاکستان اقتصادی راہداری (سی پیک) منصوبے میں دلچسپی رکھتے ہیں اور اس کا حصہ بننا چاہتے ہیں۔

بھارت کے گوا میں ہونے والے شنگھائی تعاون تنظیم کے وزرائے خارجہ کی کونسل (سی ایف ایم) کے اجلاس میں تمام اہم ایشوز پر پاکستان کا واضح موقف بھرپور انداز میں پیش کیا۔

ان خیالات کا اظہار انہوں نے جمعہ کو شنگھائی تعاون تنظیم کے اجلاس میں شرکت کے بعد یہاں پہنچنے پر پرانے حج ٹرمینل پر میڈیا سے بات چیت کرتے ہوئے کیا۔قبل ازیں وزیر اعلیٰ سندھ سید مراد علی شاہ، سندھ کے وزیر اطلاعات شرجیل انعام میمن، سندھ کے وزیر بلدیات سید ناصر حسین شاہ اور سندھ کابینہ کے دیگر اراکین نے وزیر خارجہ بلاول بھٹو زرداری کا پرتپاک استقبال کیا۔

بلاول بھٹو زرداری نے کہا کہ بی جے پی اور آر ایس ایس یہ ثابت کرنے کی بہت کوشش کر رہے ہیں کہ پوری دنیا کے تمام مسلمان دہشت گرد ہیں۔

انہوں نے مزید کہا کہ ہندوستانی سرزمین پر ایس سی او اجلاس میں شرکت کا مقصد اس سوچ کی نفی کرنا بھی تھی۔

انہوں نے کہا کہ ہندو برادری سے تعلق رکھنے والے بہت سے امیدوار پاکستان پیپلز پارٹی کے ٹکٹ پر پاکستان میں عام انتخابات میں حصہ لیتے ہیں لیکن بھارت میں ایک بھی مسلم امیدوار بی جے پی کے ٹکٹ پر منتخب نہیں ہوتا۔بھارتی میڈیا کے ساتھ بات چیت کے بارے میں بات کرتے ہوئے انہوں نے کہا کہ انہوں نے واضح طور پر بھارتی میڈیا کے ذریعے تمام اہم مسائل پر پاکستان کی حقیقی تصویر اور موقف کو بھارتی عوام تک پہنچایا۔