مجتبیٰ خامنہ ای نئے سپریم لیڈر مقرر،ایران کے اسرائیل پر بھرپور میزائل حملے

تہران:امریکی واسرائیلی حملوں میں سپریم لیڈر آیت اللہ خامنہ ای کی شہادت کے بعد ان کے صاحبزادے مجتبیٰ خامنہ ای ایران نے تیسرے سپریم لیڈر مقرر ہو گئے ہیں۔

ایران کے سرکاری نشریاتی ادارے کے مطابق ملک نے اپنے نئے رہنما مجتبیٰ خامنہ‌ ای کی قیادت میں پہلی بار سرائیل کی جانب میزائل داغے ہیں، میزائل کی تصویر بھی جاری کی گئی جس پر لکھا ہوا تھا ، ’’لبیک سید مجتبیٰ‘‘۔

اس سے پہلے مجلس خبرگان رہبری نے آیت اللہ خامنہ ای شہید کے بیٹے مجتبیٰ علی کو تیسرے سپریم لیڈر کے طور پر متعارف کرایا اور مقرر کر دیا ہے، ایران کی سیاسی و عسکری قیادت نے نئے سپریم لیڈر کے ساتھ وفاداری کا عہد بھی کیا ہے۔

ایرانی پاسدارانِ انقلاب نے اعلان کیا ہے کہ اس نے ’آپریشن وعدۂ صادق 4‘ کا 30 واں مرحلہ شروع کر دیا ہے جس کے دوران خطے میں موجود امریکی فوجی اڈوں اور اسرائیلی اہداف کو میزائلوں اور ڈرونز کے ذریعے نشانہ بنایا گیا۔

پاسداران انقلاب کے شعبہ تعلقات عامہ کی جانب سے جاری بیان کے مطابق یہ کارروائی رمضان المبارک کے انیسویں روز کے موقع پر کی گئی اور اسے ’امام علی‘ کے کوڈ نام سے منسوب کیا گیا ہے۔ بیان میں کہا گیا کہ یہ حملے ایران کے نئے سپریم لیڈر کے انتخاب کے ساتھ ہی کیے گئے۔

اسرائیلی میڈیا کے مطابق وسطی اسرائیل پر ایران کے بیلسٹک میزائل حملے میں کم از کم ایک شخص ہلاک جبکہ دو دیگر شدید زخمی ہو گئے۔

اسرائیلی میڈیا کا کہنا ہے کہ  کلسٹر وارہیڈ سے لیس میزائل کے ٹکڑے وسطی اسرائیل کے کم از کم 6 مقامات پر گرے، طبی حکام کے مطابق یہود ک علاقے میں ایک تعمیراتی مقام پر ایک شخص ہلاک ہوا۔

جائے وقوعہ سے سامنے آنے والی تصاویر میں زمین پر بڑے گڑھے اور گاڑیوں و عمارتوں کو دھماکوں سے پہنچنے والا نقصان دیکھا جا سکتا ہے۔

خیال رہے کہ ایران اسرائیل پر متعدد بیلسٹک میزائل داغ چکا ہے جن میں کلسٹر بم وارہیڈ نصب ہوتے ہیں، جو وسیع علاقے میں چھوٹے بم پھیلا دیتے ہیں۔

واضح رہے کہ امریکا اور اسرائیل نے دو دن قبل تہران میں آئل ڈپو پر حملے کیے جس سے تیل کے ذخائر میں آگ بھڑک اٹھی، تیل بہنے سے سڑکوں پر بھی آگ پھیلتی نظر آئی۔

میڈیا رپورٹس کے مطابق دارالحکومت تہران میں اسرائیلی فضائی حملوں کے بعد تباہ ہونے والے تیل کے ڈپو سے بہنے والا تیل شہر کے سیوریج نظام میں داخل ہوگیا، جس کے نتیجے میں سڑکوں کے کناروں پر آگ بھڑک اٹھی اور اسے مقامی طور پر آگ کی ندی قرار دیا جا رہا ہے۔