اسکاٹ لینڈ کے وزیراعظم حمزہ یوسف کیساتھ بہت جلد سرمایہ کاری کانفرنس بلا رہے ہیں: شہباز شریف

اسکاٹ لینڈ کے فرسٹ منسٹر حمزہ یوسف سے ملاقات کے بعد میڈیا سے گفتگو میں شہباز شریف کا کہنا تھاکہ اسکاٹش فرسٹ منسٹر سے ملاقات بہت اچھی رہی، بہت جلد سرمایہ کاری کانفرنس بلا رہے ہیں جس میں تجارت، ایجوکیشنل اور ٹیکنیکل ایجوکشن پر تعاون پر غور ہو گا۔

انہوں نے کہا کہ عمران خان نے میرے خلاف ہرحربہ استعمال کیا لیکن ناکامی ہوئی، نیوزی لینڈ سمیت دیگر ممالک میں میرے خلاف شواہد اکٹھے کرنے کی کوشش کی گئی، کیس میں میری بریت پورے پاکستان کی فتح ہے۔

وزیراعظم کا کہنا تھاکہ میرےخلاف بدنیتی پر مبنی جھوٹا کیس بنایاگیا، دوسال تک این سی اے نے کیس پر تحقیق کی، برطانیہ، دبئی، سوئٹزرلینڈ اور کہاں کہاں تحقیق ہوئی اور مجھے کلین چٹ ملی یہ پاکستان سرخرو ہوا۔

انہوں نے کہا کہ عمران نیازی نے ملک کو بدنام کرنےمیں کوئی کسرنہیں چھوڑی، عمران نیازی نے ملک کا پیسا برباد کیا، کتنے پیسے لگے، تحقیقات ضرور کراؤں گا۔

ان کا کہنا تھاکہ عمران نیازی نے جھوٹ پر مبنی کیس بنا کر وقت ضائع کیا، اس نے پاکستان کو بدنام کرنےکیلئے تمام حربےاستعمال کیے، عمران نیازی کا جھوٹ قوم کے سامنے آ رہا ہے، وہ سر سے پاؤں تک جھوٹا، مکار اور محسن کش آدمی ہے، ضرور اللہ کی پکڑ ہوگی۔