عمران خان کے الزامات بد نیتی پر مبنی ہیں،فوج اورانٹیلی جنس کیخلاف جھوٹےپروپیگنڈے کیخلاف قانونی کاروائی کا حق محفوظ رکھتے ہیں:آئی ایس پی آر

پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق پاکستان تحریک انصاف کے چیئر مین اور سابق وزیراعظم عمران خان نے بغیر کسی ثبوت کے ایک حاضر سروس سینئر فوجی افسر پر انتہائی غیر ذمہ دارانہ اور بے بنیاد الزامات عائد کیے ہیں۔

ترجمان پاک فوج نے کہا ہے عمران خان کے من گھڑت اور بدنیتی پر مبنی الزامات انتہائی افسوسناک، قابل مذمت اور ناقابل قبول ہیں۔ پچھلے ایک سال کے دوران فوجی اور انٹیلی جنس ایجنسیوں کے اہلکاروں کو سیاسی مقاصد کے حصول کے لیے اشتعال انگیزی اور سنسنی خیز پروپیگنڈے کا نشانہ بنایا جا رہا ہے۔

آئی ایس پی آر کے مطابق ہم متعلقہ سیاسی رہنما سے کہتے ہیں وہ قانونی راستے کا سہارا لیں، جھوٹے الزامات لگانا بند کریں۔ ادارہ واضح طور پر جھوٹے اور غلط بیانات اور پروپیگنڈے کے خلاف قانونی کارروائی کرنے کا حق محفوظ رکھتا ہے۔