میڈیکل بورڈ نے پولیس کو یاسمین راشد کی گرفتار سے روک دیا

تحریک انصاف کی بزرگ رہنما یاسمین راشد سروسز اسپتال میں زیر علاج ہیں، اور اسپتال کے میڈیکل بورڈ کا کہنا ہے کہ پی ٹی آئی رہنما کو سانس لینے میں دشواری آرہی ہے، ڈاکٹرز نے ان کو 2 سٹی اسکین تجویز کئے ہیں۔

دوسری جانب پنجاب پولیس یاسمین راشد کو عدالت میں پیش کرنے کے لئے سروسز ہسپتال پہنچ گئی، لیکن خرابی صحت کے باعث میڈیکل بورڈ نے پولیس کو یاسمین راشد کو ساتھ لے جانے کی اجازت نہیں دی۔

واضح رہے کہ تحریک انصاف کی رہنما ڈاکٹر یاسمین راشد لاہور پولیس کو تین مقدمات میں مطلوب ہیں اور ان کے خلاف تھانہ سرور روڈ، گلبرگ اور تھانہ شادمان میں مقدمات درج ہیں، تینوں مقدمات میں دہشتگردی سمیت دیگر سنگین دفعات شامل ہیں۔

گزشتہ رات بھی ماڈل ٹاؤن ڈویژن کی پولیس ڈاکٹر یاسمین راشد کو گرفتار کرنے کے لیے سروسز اسپتال پہنچی تھی، تاہم طبعیت ناسازی کے باعث انہیں اسپتال میں ہی رکھنے کا فیصلہ کیا گیا۔

گزشتہ روز یاسمین راشد کے وکیل احمد اویس نے لاہور ہائیکورٹ میں یاسمین راشد کو 3 ایم پی او کے تحت نظر بند کرنے کے خلاف درخواست دائر کی، جس پرجسٹس صفدر سلیم شاہد نے سماعت کی۔

یاسمین راشد کے وکیل احمد اویس نے عدالت کو بتایا کہ یاسمین راشد کینسر سمیت دیگر امراض میں مبتلا ہیں، انہیں غیر قانونی طور پر نظر بند کیا گیا ہے۔سرکاری وکیل نے عدالت کو بتایا کہ یاسمین راشد لوگوں کے ہجوم کی سربراہی کررہی تھیں، اگر وہ بیمار ہیں تو بیماروں کا پرائیویٹ اسپتال میں علاج ہوسکتا ہے۔ عدالت کو کسی کے لیے خاص طور پر عدالت نہیں لگانی چاہیئے۔

عدالت نے ریمارکس دیے کہ آپ عدالتوں کو متنازعہ نہ بنائیں، ججز ہفتے کے روز عدالت میں آتے ہیں۔جس پر سرکاری وکیل نے کہا کہ اس بات سے ان کا مقصد عدالت کو متنازعہ بنانا نہیں ہے۔یاسمین راشد کے وکیل نے بتایا کہ ڈپٹی کمشنر نے نظر بندی کے احکامات جاری کیے جو اس کا اختیار نہیں ہے۔

عدالت نے دلائل مکمل ہونے پر یاسمین راشد کی نظر بندی کے لیے جاری حکم معطل کرتے ہوئے فوری رہائی کا حکم دیا تھا۔