پارلیمنٹ آئین کے خلاف قانون بنائےگی تو عدالت کالعدم قرار دے سکتی ہے،بیرسٹر علی ظفر

پاکستان تحریک انصاف  کے سینیٹر علی ظفر کا کہنا ہے کہ  پی ٹی آئی پر پابندی لگائی گئی تو عدالت ایک ہی دن میں کالعدم قرار  دے دےگی۔

سپریم کورٹ کے باہر میڈیا سے گفتگو میں سینیٹر علی ظفرکا کہنا تھا کہ توڑ  پھوڑ  انفرادی عمل ہے، اس بنیاد پر کسی جماعت پر پابندی نہیں لگائی جاسکتی، ماضی میں جماعت اسلامی پرپابندی لگانے کی کوشش کی گئی تھی، ماضی میں سپریم کورٹ کہہ چکی ہے کہ آپ کسی سیاسی جماعت پرپابندی نہیں لگاسکتے۔

ینیٹر علی ظفرکا کہنا تھا کہ دہشت گردی اور انتشار پھیلانے والی جماعت سے متعلق مختلف قوانین ہیں، اگر پی ٹی آئی پرپابندی لگائی گئی تو امید ہے سپریم کورٹ ایک ہی دن میں کالعدم قرار دےگی، قوانین پرکوئی عمل درآمد نہیں ہو رہا، عدالتیں لوگوں کو ضمانت دیتی ہیں، جیل سے نکلتے ہی دوسرے مقدمے میں انہیں گرفتار کرلیا جاتا ہے۔ یہ لاقانونیت ہے، اس پر پٹیشن فائل کر رہےہیں، عدالت ایکشن لےگی۔

ان کا کہنا تھا کہ آئین کہتا ہے کہ اگر پارلیمنٹ آئین کے خلاف قانون بنائےگی تو عدالت کالعدم قرار دے سکتی ہے، سپریم کورٹ نے کہا ہے تحمل سے سن رہے ہیں آئین اور قانون کے مطابق فیصلے کریں گے۔