شمالی وزیرستان میں پولیو مہم کے دوران دہشتگردوں کی فائرنگ سے ایک اہلکار شہید

پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق شمالی وزیرستان کے علاقے اسپن وام میں دہشت گردوں نے پولیو ٹیم کے ارکان پر فائرنگ کر کے جاری پولیو مہم میں خلل ڈالنے کی کوشش کی۔

آئی ایس پی آر  کے بیان کے مطابق پولیو ٹیم کو تحفظ فراہم کرنے کے لیے تعینات سیکیورٹی فورسز نے دہشت گردوں کے ٹھکانے کا مؤثر طریقے سے جائزہ لیا اور ٹیم کے تمام ارکان کی حفاظت کو یقینی بنایا اور انہیں بغیر کسی نقصان کے باہر نکال دیا۔

آئی ایس پی آر کے مطابق اس دوران سیکیورٹی فورسز اور دہشت گردوں کے درمیان فائرنگ کے تبادلہ ہوا جس کے باعث ضلع مردان کے 25 سالہ سپاہی ثاقب الرحمان نے شہادت کو گلے لگاتے ہوئے اپنی جان کا نذرانہ پیش کیا۔

بیان کے مطابق علاقے میں پائے جانے والے دہشت گردوں کو ختم کرنے کے لیے کلیئرنس آپریشن جاری ہے۔

آئی ایس پی آر کے مطابق پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔