مائنس ون؟ پی ٹی آئی کے بانی ممبر اکبر ایس بابر نے اندر کی خبر دیدی

پاکستان تحریک انصاف کے بنیاد رکھنے والے بانی سینئر رہنما اکبر ایس بابر نے جی این این کو انٹرویو میں کہا کہ آج پارٹی جو تباہ حالی اور انتشار کا شکار ہے پارٹی جن اصولوں پر بنائی گئی تھی ان پر عمل پیرا رہتی تو آج یہ حالت نہ ہوتی، ہم نے جب پارٹی کی بنیاد رکھی تھی تو اس میں جو رہنما اصول تھے جس میں ورکر کی کیا حیثیت ہوگی، کرپشن کا کیسے قلع قمع کیا جائے گا، اس طرح کے بہت سے پہلو شامل تھے۔

انہوں نے کہا کہ 2011 میں پارٹی جب بے راہ روی کا شکار ہوتی دیکھ کر اور پارٹی میں غیر قانونی ذریعے سے پیسہ آرہا ہے جو ہمارے منشور کیخلاف تھا  مجھے توقع تھی کہ عمران خان پارٹی کے بنیادی اصولوں کا ساتھ دے گا مگر ایسا نہیں تھا، اس سمجھ گیا تھا کہ یہ پارٹی نہ صرف خود ڈوبے گی بلکے ملک کو بھی نقصان پہنچائے گی۔

یہ جو آج پی ٹی آئی کے انقلابی بنتے تھے آج جو چھلانگیں مار نکل رہے ہیں انہیں لوگوں نے اس کشتی میں سوراخ کئے ہیں۔

فارن فنڈنگ کیس کے متعلق سوال کے جواب میں اکبر ایس بابر نے جی این این پلس کے نمائندے سے گفتگو کے دوران کہا کہ فارن فنڈنگ کیس کا فیصلہ 8 سال بعد آیا جس پر ابھی بھی عملدرآمد ہونا باقی ہے، آٹھ سالوں میں ہر قسم کے مرحلے سے گزرا ہوں قتل کرنے کی دھمکیاں بھی ملتی رہی ہیں، عمران خان کے قریبی ساتھیوں نے بتایا کہ میرے خلاف منصوبہ بندی کی جارہی ہے۔

مائنس ون ہونے یا مائنس 10 قانون کے مطابق سب کو سزا ملنی چاہیے، جہاں تک میرا کسی پارٹی میں جانے کا سوال ہے تو میں اسی پارٹی کی ازسرنو تجدید نو کرونگا۔