اقوام متحدہ کی سیکیورٹی کونسل کی کوئٹہ دھماکے کی شدید مذمت

تفصیلات کے مطابق   اقوام متحدہ (یو این ) کی سیکیورٹی  کونسل نے کوئٹہ دھماکے کی شدید مذمت کردی۔ سیکیورٹی کونسل کے رکن ممالک نے پاکستانی حکومت اورعوام سے اظہاریکجہتی کیا ہے۔

سیکیورٹی کونسل کا کہنا ہے کہ  دہشت گردی کی ہرقسم اورشکل کی مذمت کرتےہیں، دہشتگردی کا کوئی جوازنہیں پیش کیا جا سکتا، دہشتگردی کیلیے  کسی نام نہاد مقصد کی آڑ نہیں لی جا سکتی، دہشتگردی کے پشت پناہوں کو ہر صورت کٹہرے میں لانا چاہیے۔

چند روز قبل  کوئٹہ میں خودکش  دھماکہ ہوا تھا،  دھماکہ زرغون روڈ پر شہر کے معروف ہوٹل کے قریب ہوا تھا،جس میں متعدد افراد زخمی ہوگئے تھے۔

وزیر داخلہ شیخ رشید کا کہنا تھا کہ کوئٹہ میں جو خونی واقعہ ہوا تھا  وہ خود کش حملہ تھا ، کوئٹہ حملے میں 5 لوگ جاں بحق ہوئے تھے،دھماکہ کے وقت خودکش حملہ آور گاڑی میں بیٹھا رہا۔انہوں نے مزید کہا تھا کہ کوئٹہ میں 13 چوکیوں کا کمان پولیس کو دے دیا گیا تھا۔ خیال تھا کہ ایف سی کو کوئٹہ سے نکالیں لیکن اب ایسا نہیں ہے، ایف سی کو کوئٹہ سے نہیں نکالیں گے۔

ان کا کہنا تھا یہ ان پاکستان دشمن عناصر کی کارروائی ہے جنہیں پاکستان کی ترقی ایک آنکھ نہیں بھاتی، اس حملے کی جتنی بھی مذمت کی جائے کم ہے۔