کورونا کی دوسری لہر ، اکشے کمار کا ایک کروڑ روپے کی امداددینے کا اعلان

غیر ملکی خبر رساں ادارے کے مطابق  سپر اسٹار اکشے کمار نے سابق بھارتی  کرکٹر اور  سیاستدان گوتھم گھمبیر کی فاؤنڈیشن کو کورونا کے خلاف اقدامات کرنے کیلئے ایک کروڑ کی مالی امداد دینے کا اعلان کیا ہے۔

سماجی رابطے کی ویب سائٹ ٹوئٹر پر ایک پیغام میں سابق کرکٹر گو تھم گھمبیر نے  اکشے کمار کا شکریہ ادا کرتے ہوئے کہا کہ"  گوتھم گھمبیر فاؤنڈیشن کو ضرورت مندوں کی غذا، ادویات، آکسیجن کی ضرورت پوری کرنے کے لیے ایک کروڑ کا اعلان کرنے پر اکشے آپ کا بہت شکریہ"۔

Every help in this gloom comes as a ray of hope. Thanks a lot @akshaykumar for committing Rs 1 crore to #GGF for food, meds and oxygen for the needy! God bless ?? #InThisTogether @ggf_india

— Gautam Gambhir (@GautamGambhir) April 24, 2021

دوسری جانب سوشل میڈیا صارفین کی جانب سے اکشے کے اس اقدام کو خوب سراہا جارہا ہے۔

خیال رہے کہ بھارت میں کورونا کی دوسری لہر کے دوران کیسز اور اموات کی بڑھتی تعداد میں مسلسل اضافہ ہوتا جا رہا ہے، ایسے میں آکسیجن کی کمی کو پورا کرنے کے لیے بالی وڈ کی مشہور شخصیات اپنی خدمات پیش کر رہی ہیں۔جان لیوا کورونا وائرس بھارت میں قہر ڈھانے لگا۔ایک روز میں تین لاکھ 49ہزار سے زائد نئے کیس سامنے آگئے ہیں  جبکہ دو ہزار سات سو سے زائد اموات بھی رپورٹ ہوئی ہیں  ۔

ممبئی میں ہرتین میں سے ایک شخص مہلک وائرس کا شکارہونے لگا۔اسپتالوں میں  جگہ ختم  ہوگئی۔بھوپال سمیت کئی شہرو ں میں ٹرین کی بوگیوں کو آئسولیشن سینٹرز میں تبدیل کردیاگیا۔

بھارت میں  آکسیجن کی مانگ بھی پوری نہ ہوسکی۔ہریانہ کے مقامی اسپتال میں آکسیجن کی کمی سے4افراد مارےگئے۔احمدآباد کا آکسیجن پلانٹ چوبیس گھنٹے کام کرنےلگا۔بھارتی ائیرفورس کا طیارہ  بھی سنگاپور سے  آکسیجن ٹینکر لےکرمغربی بنگال پہنچ گیا۔

بھارت کی کئی ریاستوں میں کورونا ویکسین بھی کم پڑگئی ہے۔دہلی میں نافذ کورونا لاک ڈاون میں ایک ہفتے کیلئے توسیع کردی گئی۔لاک ڈاؤن کی خلاف ورزی کرنیوالوں کو سڑک پرہی سزائیں ملنے لگیں۔