حکومت کا سوشل میڈیا پر غیر قانونی لون اپلی کیشنز کیخلاف سخت کارروائی کا آغاز

حکومت نے سوشل میڈیا پر غیر قانونی لون اپلی کیشنز کیخلاف سخت کارروائی کا آغاز کردیا ہے، وزارت انفارمیشن ٹیکنالوجی نے کریک ڈاؤن کرتے ہوئے 43 غیرقانونی ایپس کو بند کردیا ہے۔

وفاقی وزیر آئی ٹی سید امین الحق کا کہنا ہے کہ فیس بک، اوردیگرسوشل میڈیا پلیٹ فارمز کےذریعے قرضہ دینے والا مافیا سادہ لوح افراد کو بلیک میل کررہا ہےاور اس طرح کی کمپنیاں سیکیورٹیز اینڈ ایکسچینج کمیشن میں رجسٹرڈ ہوتی ہیں جبکہ حالیہ واقعات میں عام صارف کے ڈیٹا تک رسائی کے ذریعے بلیک میلنگ کے واقعات ناقابل برداشت ہیں۔

وفاقی وزیر نے اب تک کی کارروائیوں پر بریفنگ لی،انہوں نے کہا کہ صارفین کی آگاہی کیلئے مہم بھی چلائی جائے تاکہ وہ اس طرح سے بلیک میلنگ مافیا کا شکار نہ ہو سکیں ۔۔وزارت انفارمیشن ٹیکنالوجی نے عوام سے بھی اپیل کی ہے کہ وہ سوشل میڈیا اشتہارات سےمتاثرہوکرذاتی ڈیٹا کسی سےشیئرنہ کریں، عوام ایسی ایپلی کیشنز کی شکایت، پی ٹی اے، ایف آئی اے سائبر کرائم اور مقامی پولیس کے پاس درج کرائیں۔

وفاقی وزیر آئی ٹی سید امین الحق نے کہا کہ ایف آئی اے سائبرکرائم ونگ شکایات کا انتظارکرنے کے بجائے ایسے عناصر کے خلاف ازخود کارروائی کرے، عوام کی مجبوریوں کا فائدہ اٹھاکرانھیں موت کے اندھیروں میں دھکیلنے والے عناصر کی سرکوبی ضروری ہے، دھمکیاں، بلیک میلنگ، صارف کے ذاتی ڈیٹا کا استعمال خلاف قانون ہے، قرضہ ہزاروں کا اور واپسی لاکھوں میں ہوتی ہے۔