سائفر ایک حقیقت ہےجس پر ملک کی سول اور ملٹری لیڈر شپ نے اتفاق کیا،شاہ محمود قریشی

پاکستان تحریک انصاف کے وائس چیئرمین اور سابق وفاقی وزیر خارجہ شاہ محمود قریشی کا کہنا ہے ک سائفر ایک حقیقت تھی اور ایک حقیت ہے اور اس پر ملک کی سول اور ملٹری لیڈر شپ نے اتفاق کیا جس سے اس وقت کی اپوزیشن کی نفی ہو گئی۔

تحریک انصاف کے وائس چیئرمین شاہ محمود قریشی اسلام  آباد میں ایف آئی اے کے ہیڈ کوارٹر پہنچے جہاں وہ سائفر اور آڈیو لیک کے معاملے کی تحقیقات کرنے والی مشترکہ تحقیقاتی ٹیم کے سامنے پیش ہوئے

میڈیا سے گفتگو کرتے ہوئے شاہ محمود قریشی کا کہنا تھا کہ سائفر تو آئے دن آتے ہیں لیکن یہ سائفر معمولی نوعیت کا نہیں تھا کیونکہ اس کی حساسیت اس نوعیت کی تھی کہ اس سائفر ہو نیشنل سکیورٹی کونسل کا دو بار اجلاس طلب کیا گیا اور چیئرمین پی ٹی آئی کی صدارت میں ہوا اور دوسرا موجودہ حکومت میں طلب کیا گیا۔ دونوں اجلاسوں میں سائفر کی حقیقت اور حساسیت کو تسلیم کیا گیا اور ساتھ کی اس کا بھی اعتراف کیا گیا کہ سائفر میں جو سفارتی زبان استعمال کی جاتی ہے یہ اس کے برعکس ہے اور یہ بھی تسلیم کیا گیا کہ مداخلت کی گئی ہے۔

کیا چیئرمین پی ٹی آئی کو سائفر کے معاملے پر خاموش رہنا چایئے تھا؟
شاہ محمود قریشی کاپیشی کے بعد تہلکہ خیز بیان سامنے آگیا pic.twitter.com/czs7Kspm4w

— GNN (@gnnhdofficial) July 24, 2023

وائس چیئرمین پی ٹی آئی کا کہنا تھا کہ جس اجلاس کی صدارت شہباز شریف نے کی تھی اس میں بھی سائفر کو جھٹلایا نہیں گیا۔اس معاملے کی تحقیقات کے لئے چیئرمین پی ٹی آئی نے دیانتداری سے بحیثیت وزیر اعظم نے کوشش کی اور ایک مناسب تجویز دی کہ سپریم کورٹ کی سربراہی میں ایک آزاد تحقیقات کرا لی جائے تاکہ دودھ کا دودھ، پانی کا پانی ہو جائے، اگر ایسا ہو جاتا تو جتنی قیاس آرائیاں ہوئیں اور جتنی اس پر بیان بازی ہوئی اس کی نوبت ہی نہ آتی۔ 

سابق وفاقی وزیر نے کہا کہ یہ تاثر دینے کی کوشش کی جا رہی ہے کہ تحریک انصاف یا چیئرمین پی ٹی آئی سائفر کو سیاسی مقاصد کےلئے استعمال کرنا چاہ رہے ہیں لیکن یہ بھی حقیقت کے برعکس ہے کیونکہ اگر ہماری ایسی کو نیت ہوتی تو نیشنل سکیورٹی کمیٹی کے اجلاس کے بعد ہم اپوزیشن کو اعتماد میں لینے کی کوشش نہ کرتے۔

شاہ محمود قریشی کا کہنا تھا کہ یہ بھی حقیقت ہے کہ پارلیمانی کمیٹی اور نیشنل سکیورٹی کا اجلاس بلایا گیا جس میں پارلیمنٹ میں موجود تمام پارٹیوں کے سربراہان کو دعوت دی گئی کہ وہ آئیں اور بریفنگ لیں، انہیں پورے حقائق سے آگاہ کیا جائے گا تاکہ پوری قوم یکجا ہو جائے لیکن بدقسمتی سے اس وقت کی اپوزیشن نے اس اجلاس کا بائیکاٹ کیا۔