19 کروڑ پاؤنڈ سکینڈل: نیب نے چیئرمین پی ٹی آئی کو آج دوبارہ طلب کر لیا

اسلام آباد: پاکستان تحریک انصاف (پی ٹی آئی) کے چیئرمین عمران خان کو قومی احتساب بیورو (نیب) نے 190 ملین پاؤنڈز سکینڈل میں آج (جمعہ) کو دوبارہ طلب کر لیا ہے۔

تفصیلات کے مطابق چیئرمین پی ٹی آئی کو آج صبح ساڑھے 11 بجے سماعت کے دوران متعلقہ دستاویزات لانے کی ہدایت بھی کی گئی ہے۔ اعظم خان کا بطور گواہ بیان ریکارڈ کرانے کے بعد چیئرمین پی ٹی آئی کی یہ پہلی پیشی ہوگی۔

چیئرمین تحریک انصاف کو اسلام آباد اور لاہور میں بالترتیب بنی گالہ اور زمان پارک کی رہائش گاہوں پر طلبی کے سمن جاری کیے گئے ہیں۔

دوسری جانب اسلام آباد پولیس نے دیگر پانچ مقدمات میں چیئرمین پی ٹی آئی کو بھی آج طلب کر لیا ہے، انہیں تھانہ ترنول میں درج دو، کراچی کمپنی تھانے میں دو اور تھانہ کوہسار میں ایک مقدمے میں طلب کیا گیا ہے۔

اسلام آباد پولیس کی جانب سے جاری نوٹس میں ان سے کہا گیا ہے کہ وہ تفتیش میں شامل ہوں اور اپنا موقف پیش کریں اور کیس سے متعلق شواہد بھی فراہم کریں۔