معاشی آزادی کیلئے بڑی اصلاحات کرنا ہوں گی:وزیراعظم

اسلام آباد: وزیراعظم محمد شہباز شریف نے کہا ہے کہ آئندہ حکومت کو معاشی آزادی کے حصول اور عام آدمی پر بوجھ کم کرنے کیلئے بڑی اصلاحات شروع کرنا ہوں گی۔

اسلام آباد میں اتحادی جماعتوں کی قیادت کے اعزاز میں ان کی طرف سے دیئے گئے عشایئے میں اظہارخیال کرتے ہوئے انہوں نے کہا کہ گزشتہ پندرہ ماہ کے دوران اتحادی حکومت نے معاشی مشکلات، آئی ایم ایف کے ساتھ ناموافق بات چیت، تباہ کن سیلاب، مہنگائی اور سیاسی انتشار سمیت غیر معمولی مسائل کا سامنا کیا۔ انہوں نے کہا عمران نیازی کی حکومت نے چین سمیت دوست ممالک کے حوالے سے اپنے غیر ذمہ دارانہ رویے سے خارجہ تعلقات کو نقصان پہنچایا اور منصوبوں میں بدعنوانی کے جھوٹے الزامات عائد کئے۔

انہوں نے کہا کہ ان کی حکومت نے چین کے ساتھ تعلقات بحال کئے جس نے ماضی میں پاکستان کے بنیادی ڈھانچے میں پچیس ارب ڈالر سے زائد سرمایہ کاری کی تھی۔ انہوں نے اتحادی رہنمائوں، نواز شریف، آصف علی زرداری اور مولانا فضل الرحمن سمیت دیگر قیادت کا قومی اسمبلی میں اُن پر اعتماد کا اظہار کرنے، رہنمائی اور مدد فراہم کرنے پر شکریہ ادا کیا۔